करेन्ट लागेर मृत्यू प्रकरणमा नयाँ ट्वीस्ट, मोटो रकम लिएर जाहेरीमा नाम थपघटको आरोप

न्यूज ब्यूरो, १४ साउन । धनुषामा करेन्ट लागेर मृत्यू भएको प्रकरणमा केही व्यक्तिहरुले मोटो रकम लिएर जाहेरीको नाम परिवर्तन सहित थपघटको प्रयास गरेको आरोप लगाइएको छ ।

गत असार ३० गते धनुषाधाम नगरपालिका वडा नम्बर ७ किसानपुरस्थित करेन्ट लागेर एक युवकको मृत्यू भएपछि केही स्थानीय नेता सहित एनजिओबालाहरु मोटो रकमको माग गरी नाम थपघट गरेको आरोप लगाइएको छ ।

इलाका प्रहरी कार्यालय धनुषाधामले मृतक परिवारको तर्फबाट दिइएको जाहेरी नलिएपछि हुलाक मार्फत जाहेरी पठाएको थियो भने यसबीचमा एक स्थानीय नेता र एक एनजिओकर्मीले रकम माग गरेको आरोप लगाएको छ ।

करेन्ट लागेर मृत्यू भएका २१ बर्षिय धनी यादवको काकाले इलाका प्रहरी कार्यालय धनुषाधाममा दिएको जाहेरीमा १५ जनाको नाम हालिएको थियो । सो जाहेरी हुलाक मार्फत आएको इलाका प्रहरी कार्यालय धनुषाधामका प्रहरी नीरिक्षक सुरेश ठाकुरले बताए ।

१५ जनाको नाममा आएको जाहेरीमा अनुसन्धान बढाउँदै जाँदा केही व्यक्तिहरु हस्क्षेप गरी आर्थिक चलखेल गरेर ७ जनाको नाममा मात्र जाहेरी दिन आएपछि केही निर्दोष फँसाउन लागिएको र दोषी उम्काउन खोजेको प्रष्टाएको बताए ।

पीडित परिवारको तर्फबाट हुलाक मार्फत १५ जनाको नाममा जाहेरी परिसकेको अवस्थामा धनुषाधाम ७ बस्ने शरिन प्रताप मल्ल र एनजिओकर्मी सरोज रायले ७ जनाको नाम लिएर जाहेरी दिन आएको इन्सपेक्टर ठाकुरले बताए । उनले १५ जनाको नाममा जाहेरी हुलाक मार्फत पर्नु र त्यसपछि सोही जाहेरीमा भएको नामहरु हटाएर अन्य व्यक्तिहरुको नाम थप्नु, केही जनालाई हटाउनु नै शँकास्पद लागेपछि जाहेरी दर्ता तत्काल नगरेको स्वीकारे ।

पीडित परिवारसँग प्रहरी समन्वय गरिरहकै बेला शरिन प्रताप मल्ल र सरोज रायले अस्वभाविक हस्तक्षेप गरी मुद्दालाई बँग्याउन खोजेपछि आफू कडा भएको बताए । ईन्सपेक्टर ठाकुरले हुलाक मार्फत आएको जाहेरी नै दर्ता हुने भनिएपनि मल्ल र रायले ल्याएको ७ जनाको नाममा जाहेरी दर्ता गर्न दबाब दिएपछि शँका उत्पन्न भएको बताए ।

प्रारम्भिक अनुसन्धानकै क्रममा करेन्ट लागेर घाईते भएका दुई जनामध्येका राजु साहले अहिले पनि आफूहरु भाग्ने क्रममा करेन्ट लागेको बयान दिएका छन् भने सोही ठाउँमा करेन्ट लागेर घाईते भई बाँचेका रामजीवन यादवले आफूहरुलाई कुटपिट गर्दै बेहोस पारी तारमा फालेको आरोप लगाएका थिए ।

हाम्रा न्यूज ब्यूरोका धनुषा प्रमुख विनय कुमार यादवले घटनाको बारेमा स्थलगत रिर्पोटिँग गर्दै जाँदा रामजीवनलाई उक्साएर उनीहरुले नै आफूहरुलाई तारमा फालेको झुठो बयानबाजी गर्न लगाएको आरोप पनि लगाइएको छ ।

करेन्ट तीन जनालाई लागेको थियो । जसमध्ये धनी यादवको मृत्यू भयो भने रामजीवन र राजु साह बाँच्न सफल भयो । सोही मुद्दालाई बँग्याएर आर्थिक प्रलोभनमा परी मोटो रकम खाने दाउमा तथा व्यक्तिगत रिसबी साध्नको लागि सरिन मल्ल सक्रिय भएको बताईन्छ ।

को हुन सरिन प्रताप मल्ल ?
सरिन प्रताप मल्ल धनुषाधाम नगरपालिका वडा नं. ७ बस्ने पुण्य प्रताप भन्ने कृष्ण प्रताप मल्लका छोरा एवम् स्थानीय नेता हुन । उनी नेपाली सेनाका पूर्व–मेजर पनि हुन । मल्ल सरोज रायका साथी पनि रहेको स्थानीयहरु बताउँछन् ।

यो घटनामा जाहेरीमा नाम परेको शिवशँकर साहका भाई श्याम साह सुडिलाई बलपूर्वक नाम राख्न लगाइएको आरोप शिवशँकरको छ ।

शिवशँकरसँग सरिन मल्लको जमिन र रकम लेनदेनको मामिला भएकोले सोही निहुँमा शिवशँकरका भाईलाई फँसाउन दौडधुप गरेको आरोप छ ।

यस सन्दर्भमा सरिन प्रताप मल्लको मोबाइल नम्बर ९८५१०९१७३८ मा सम्पर्क गर्दा उनले फोन उठाएनन् ।

सरोज राय र सरिन मल्लले २ देखि ५ लाखसम्म रकम उठाएर जाहेरीको नाम परिवर्तन गर्न दबाब दिएको आरोप स्थानीय शिवशँकर साहले लगाएका छन् । (रेकर्ड प्रमाणहरु सुरक्षित छ ।)

उनका अनुसार, सरिन मल्ल र सरोज रायले अन्य तेस्रो व्यक्ति मार्फत भाईको नाम जाहेरीबाट हटाउने भन्दै रकम माग गरेको आरोप लगाएका छन् । उनले नाम हटाउनको लागि र नाम थप गर्नको लागि मृतक परिवारलाई समेत प्रशिक्षण दिएको आरोप छ ।
मृतकका काकाले दिएको जाहेरीमा १५ जनाको नाम भएपनि पीडित परिवारकै तर्फबाट उनको आमाले सरोज राय र सरिन मल्लसँग धनुषाधाम प्रहरीमा जाँदा ७ जनाको नाम मात्रै थियो ।

यस क्रममा ८ जनाको नाम हटाएर उनीहरुबाट रकमको लेनदेन गरी दबाब बनाएको आरोप लगाइएको छ । यद्यपी, यस आरोपलाई एनजिओकर्मी सरोज रायले अस्वीकार गरेका छन् ।

न्यूज ब्यूरोसँगको कुराकानीमा रायले आफूमाथि झुठो आरोप लगाएको प्रतिक्रिया दिएका छन् । उनले जाहेरीमा कसको र कति जनाको नाम बारे आफूलाई केही थाहा नभएको बताउँदै प्रहरीलाई जाहेरी दर्ताको लागि दबाब मात्र दिएको दाबी गरे ।

सरोज राय स–सानादेखि जुनसुकै घटनालाई फेसबुकमा हाल्ने गरेको छ । रायमाथि यस्तो आरोप लागेपछि उनी फेरी पनि फेसबुक मार्फत आफ्नो तर्फबाट सफाई दिने अनुमान गरिएको छ । (अपरेशन भाग-२) (रेकर्ड प्रमाणहरु सुरक्षित छ ।)