रेशम चौधरीलाई पार्टीबाट निष्कासित गर्ने कुनै निर्णय भएको छैनः प्रवक्ता खतिवडा

न्यूज ब्यूरो, १३ साउन । जनता समाजवादी पार्टी (जसपा) नेपालका प्रवक्ता डम्बर खतिवडाले रेशम चौधरीलाई कारवाही गरिने जस्तो कुनै निर्णय नभएको बताएका छन् ।

जसपाका प्रचारप्रसार विभागका खतिवडाले जसपाको मंगलबार बसेको कार्यकारिणी समितिको बैठकले ३४ सदस्यीय कार्यकारिणी समिति कायम गर्ने निर्णय मात्र भएको बताए ।

न्यूज ब्यूरोसँगको सँक्षिप्त कुराकानीमा उनले “पार्टीको आधिकारीकता दावी गर्दा अध्यक्ष उपेन्द्र यादवको पक्षमा हस्ताक्षर गर्ने मात्रै जसपाका कार्यकारिणी सदस्य हुन्। र उनीहरुलाई नै समितिमा राखिएको छ । अन्य कुनै निर्णय भएको छैन ।”

उनले भने, “तत्कालका लागि ३४ सदस्यीय कार्यसमिति कायम भएको छ।अब थप्नु परेमा पार्टीले निर्णय गर्छ।” उनले रेशम चौधरी लगायत अन्य कुनै पनि सदस्यलाई कारवाहीबारे कुनै निर्णय नभएको सुनाए ।

सोमबार निर्वाचन आयोगमा भएको हेड काउण्टमा उपेन्द्र यादवको पक्षमा ३४ जनाले हस्ताक्षर गरेका थिए । महन्थ ठाकुरको पक्षमा १६ जना थिए भने रेशम चौधरी तटस्थ बसेका थिए।