'उपकार' ब्राण्डको चामल बोराभित्रै सडेको दुर्गन्धित वस्तु फेला

न्यूज ब्यूरो, १२ साउन । बजारमा सप्लाई गर्ने उपकार ब्राण्डको चामलको बोरामा अखाद्य वस्तु फेला परेको छ ।

मँगलबार जनकपुरधाम उपमहानगरपालिका वडा नम्बर १० सरस्वतिटोलस्थितबाट एक उपभोक्ताले किनेको चामलको बोराभित्र सडेगलेको वस्तु फेला परेको हो ।

विहान करिब १० बजेको समयमा स्थानीय एक पसलबाट खरिद गरिएको उपकार ब्राण्डको जिरा मसिनो चामलको बोरामा सडेगलेको अखाद्य वस्तु फेला परेको उपभोक्ता शम्भु यादवले बताएका छन् ।

उनले उपकार ब्राण्डको जिरा मसिनो चामल किनेर घर ल्याएका थिए । घरमा भात पकाउनको लागि बोरा खोलेपछि भित्र चामलमै दुर्गन्धित वस्तु फेला परेको यादवले न्यूज ब्यूरोसँग भने ।

उनले भने,–“विहान नजिकै रहेको अँकलको पसलबाट उपकार ब्राण्डको जिरा मसिनो चामल किनेर ल्याएको थिए । भाँडाकुँडा मस्काएर जब भात पकाउन गए, मैले बोरा खोले । बोराको सील खोल्ने बित्तिकै त्यसबाट ढुवास्स गन्हाएको दुर्गन्ध आयो ।”

बोराको सील खोलेपछि त्यसबाट दुर्गन्ध आएपछि यादवले चालमको बोरालाई हल्लाएर देखेपछि त्यसमा केही सडेगलेको दुर्गन्धित वस्तु फेला परेको बताएका छन् । उनले चामलभित्र कालो–कालो ढुवास्स गन्हाएको वस्तु फेला परेको बताएका छन् ।

यद्यपी, चामलभित्र गन्हाएको सडेगलेको वस्तु के रहेको छ भनेर यकिन भएको छैनन् । चामलमा गन्हाएको वस्तु देख्नेवित्तिकै पसले कहाँ गएका यादवले उपकार कम्पनीका बजार प्रतिनीधिलाई खवर गरेको बताइएको छ ।

बजारमा विज्ञापन गरी ब्राण्ड भनेर सप्लाई गर्ने उपकार ब्राण्डको चामल बोराभित्र गन्हाएको वस्तु फेला परेपछि आम उपभोक्तामा पनि नाकारात्मक असर पर्ने भएको छ । उपभोक्ताको स्वास्थ्यसँग खेलवाडका साथै गुणस्तरीयहिन खाद्य वस्तु विक्री वितरणले आम उपभोक्तामा गम्भिर असर पर्ने देखिएको छ ।