महोत्तरीको भँगहामा गैर–कानुनी खोला उत्खनन, प्रहरी नै ठेकेदारको बडिगार्ड

न्यूज ब्यूरो, जलेश्वर । महोत्तरीको विभिन्न क्षेत्रमा रहेको खोला उत्खनन अझै पनि रोकिएको छैनन् । प्रशासनिक निकाय नै ठेकेदारलाई सँरक्षण गर्न थालेपछि गैर–कानुनी रुपमा उत्खनन भइरहेको छ ।

सोही क्रममा महोत्तरी जिल्लाको महोत्तरीको भंगहा नगरपालिका वडा नम्बर ४ बिर्ता सिमा क्षेत्रबाट एक्साभेटर, जेसीबी प्रयोग गरेर अवैध रूपमा उत्खनन भइरहेको छ ।

स्थानीय प्रशासनकै मिलेमतोमा नदीजन्य पदार्थ उत्खनन भइरहेको स्थानीयको आरोप छ । रातको समयमा खोलामै अव्यवस्थित तरिकाले २५ फिटभन्दा बढी खाल्डो बनाइ अवैध उत्खनन गरिरहेको स्थानीयको भनाइ छ ।

प्रहरी प्रशासनले नदेख्ने गरी एक्साभेटर नै खाल्डोमा लुकाएर दिनरात नै अवैध तरिकाले उत्खनन गर्न गरिएको छ । खोला ठेक्का अहिले बन्द भएको भएपनि खोला क्षेत्रबाट अवैध नदीजन्य पदार्थ उत्खनन भइरहेको छ ।

ठूलो यन्त्र लगाएर नदीजन्य पदार्थ उत्खनन गर्न प्रतिबन्ध छ । तर, ठूला उपकरण यन्त्र प्रयोग गरेर खोलामा उत्खनन भइरहेको छ । स्थानीय सरकारले रोक्ने प्रयास नगरेको स्थानीयको आरोप छ ।

प्रहारीमा स्थानीयको कडा दबाब पछि मंगलबार बेलुकाको ६ बजे तिर भंगहा नगरपालिका-४ स्थित बिर्ता र पशुपतिनगरको बिचमा रहेको खोलाको खाल्डोमा ना.१ क. ५८५२ नम्बरको जेसिबी भंगहा प्रहरीले समातियो । तर जेसिबीका चालक फरार भए ।

खाल्डोमा रंगेहात समातिएको जेसीबीको चालक नहुँदा कारवाही अगाडी नबढाएको भंगहा चौकीका सय भरत शिलवालले बताए ।

यता, भंगहा नगरपालिकाका मेयर संजिव साहले उत्खननको विषयमा केहिपनि जानकारी नभएको बताउँछन । ठेकेदारसँग प्रहरी प्रशासन र स्थानीय तहको मिलोमतोमा अबैध उत्खनन् हुने गरेको स्थानीयको आरोप छ ।

स्थानीयका अनुसार, भँगहा नगरपालिकाका मेयर सँजीव साह समेतले ठेकेदारबाट कमिशन लिएर उत्खनन गर्न दिएको आरोप छ । अन्य क्षेत्रमा चनाखो मानिएको मेयर साहले आफ्नै नगरभित्र उत्खनन हुँदा चुप्पी लादनु मिलोमत्तो स्वभाविक देखिएको बताइएको छ ।