प्रदेश २ः आज नै श्रीमानको अर्को बिहे, बिहे रोक्काको लागि छटपटाउँदै महिला

न्यूज ब्यूरो, जनकपुरधाम । दाईजोको लोभमा आफ्नै श्रीमानले अर्को बिहे गर्न लागेपछि बिहे रोक्काको लागि महिलाले प्रशासन गुहारको छ ।

प्रदेश नम्बर २ को सर्लाही जिल्लास्थित एक महिलाले श्रीमानले गर्न लागेको बहुविवाह रोक्का गरी आवश्यक कार्वाहीको माग राख्दै जिल्ला प्रहरी कार्यलय सर्लाहीमा उजुरी दर्ता गराएकी छिन ।

सर्लाहीको कविलासी नगरपालिका वडा नम्बर ५ निवासी २५ बर्षिय महिला सीतादेवी रामले आफनो श्रीमान बताउने परसन रामको छोरा गंगारामले आफूलाई थाहा नै नदिई चोरीलुकी बिहे गर्न लागेको भन्दै न्यायको लागि प्रहरीमा पुगेकी छिन ।

बिहे भए लगत्तै बढी दाईजोको लालचमा पति, सासु र ससुरा मिलेर शरिरिक तथा मानसिक यातना दिन थालेको पिडित सीताले गुनासो गरिन । “आफनो कलिलो उमेरमा बिहे भएको र माईती पक्षको समेत आर्थिक अवस्था कमजोर भएका कारण आफूलाई यातना सहनुको विकल्प थिएन”– पिडित सीताले भने ।

“एक दिन सबै थोक ठिक हुन्छ, श्रीमानको मन बदलिएला भनी मैले भगवान माथि आश लगाएर सबै पिडा सहेर बस्न थाले तर उहाँले मलाई भगाउनकै लागि दिनहुँ किुटपिट समेत गर्न थाले ।”– उनले रुँदै भनिन् ।

श्रीमानले दिनहुँ निर्घात कुटपिट गर्न थालेपछि माईती पक्षलाई जानकारी गराएको बताउँदै उनले माईती पक्षले समेत समाजमा बसेर पटक–पटक पंचायत गराएको बताइन् ।

अबदेखि राम्रो सित राख्छु भनी मिलापत्र समेत गरियो तर केही दिन राम्रो सित राख्ने र फेरी कुटपिट गर्न थाल्ने गरेको पिडित महिलाले बताईन । हाम्रो माईती पक्षले विवाह दर्ता र नागरिकता समेत बनाईदिन पटक–पटक दबाब दिने गरेपनि नागरिकता बनाइनदिएको गुनासो पनि सीता पोखिन् ।

केही दिन अघि नै श्रीमान गँगारामले उनलाई निर्घात कुटपिट गरी नाबालक छोरा छोरीहरु समेत खोसी घरबाट निकाला गरी दिएको बताउँदै उनले आफनो माईतीको शरणमा गई बसी रहेको पिडित सीताले दुःखेसो पोखिन ।

आफू माईती घरमा बस्दै आएको मौका छोपी पतिले मलाई कुनै जानकारी नहुने गरी गुपचुपै तरिकाले सर्लाहीको बागमती नरपालिका वडा नम्बर ९ स्थित शंकरपुर टोलमा निवासी नरेश रामको नातिनी संग सोमबार (आज) नै बिहे गर्न लागेको भन्ने कुरा मैले गाउँ समाजबाट जानकारी पाएपछि आफनो खुटा मुनिबाट जमिन खस्किएको बताईन ।

“श्रीमती तथा छोरा छोरी समेत रहेको हुदाँ हुदै अर्को विवाह किन गर्नु हुन्छ, तपाई दोस्रो बिहे गरेपछि छोरा छोरीको भविष्य समेत संकटमा पर्ला भनी बिहे नगर्नु भन्दै रोक्न खोज्दा मलाई हातपात गरी डराई धम्काई घरबाट भगाई दिए ।”– पिडित सीताले गुनासो गरिन ।

करिब १० बर्ष अघि समाजिक परम्परा अनुसार वैवाहिक बन्धन बाँधिएकी महिलाको वैवाहिक दाम्पत्य जिवनबाट अविनाश नाम गरेको ९ बर्षिय छोरा र राधा नाम गरेकी ६ बर्षिय छोरी समेत रहेका छन ।