बर्दिवासका मेयर कार्की चुरे दोहन गराएर उत्खनन गराउँदै, बाढीमा गाउँ नै सखाप हुने चिन्ता

न्यूज ब्यूरो, बर्दिवास । प्रदेश नम्बर २ को महोत्तरी जिल्ला बर्दिबास नगरपालिका वडा नम्बर ७ स्थित गैर कानुनी रुपमा निरन्तर भइरहेको खोला उत्खननले गाउँमा बाढी पस्ने सम्भावना बढदै गएको छ ।

असारे विकासको चटारोमा सडक निर्माण तथा पोखरी पुनः निर्माण गर्न मापदण्ड मिचेर स्थानीय ठेकेदारहरुले १० फिट गहिरोसम्म ग्राभेल उत्खनन गरिरहको छ । यसले खोलामा बाढी, भेल आएपछि गाउँ नै सखाप पार्ने चिन्ता बढेको हो ।

आर्थिक वर्ष सकिनै लाग्दा स्थानीय “गोबिन्द साहको घर देखि पक्षिम कृषि सडक स्तरोन्नति“ योजना सम्पन्न गर्न धमाधम काम हुँदैछ । सो सडक स्तरोन्नतिका लागि बर्दिबास नगरपालिका– ७ स्थित कृषि बजार केन्द्र नजिक रहेको सार्वजनिक जमिनबाट बालुवा–गिट्टी उठाइँदै छ ।

स्थानीयका अनुसार कानुनी रुपले तीन फिट गहिराइसम्म मात्र बालुवा, ढुङ्गा, गिट्टी निकाल्न पाइने भएपनि १० फिट गहिरो खाल्टो खनी ग्राभेल खनिदै छ । नगरपालिकाबाट स्वीकृति लिएर बालुवा–गिट्टी खन्ने काम भइरहको नगरपालिकाका मेयर बिदुर कार्कीले बताए ।

पुरानो पोखरीलाई पुनःनिर्माण तथा फराकिलो गर्ने र सडक स्तरोन्नतिका लागि ग्राभेल खन्न नगरपालिकाले स्वीकृति दिएको उनले बताए । बस्ती जोखिममा पर्ने गरि मापदण्ड विपरित उत्खनन भएपछि स्थानीयले विरोध समेत गरेका छन् ।

मापदण्ड विपरित बालुवा गिट्टी उत्खनन गर्दा दुर्घटना हुनसक्ने भन्दै स्थानीयले विरोध गरिरहेका हुन् । मापदण्ड विपरित उत्खनन नगर्न पटक पटक अनुरोध गर्दा आफुहरुलाई ज्यान मर्ने धम्की दिएको स्थानीय अधिकलाल महतोले सुनाए ।

एलानी जग्गामा नखन्न भन्दा उनीहरु कुट्न आउँछन्,’ उनले भने – मेयरकै आदेशमा उनीहरुले मापदण्ड विपरित खनेको स्थानीयको आरोप छ ।मेयरले नै जनताको गुनासो नसुन दिएपछि कसले सुनीदिने भन्दै महतोले गुनासो पोखे ।

तर निर्माणकार्य गरिरहेकाका उपभोक्ता समितका अध्यक्ष मनोहर साहले सडक स्तरोन्नतिको लागि छुटियाएको ३ लाख रकम कम भएकाले स्थनीयहरुको थप आर्थिक सहयोग तथा ऐलानी जग्गाबाट ग्राभेल झिक्दा आफुहरुलाई निर्माणको काम ग्राभेलको रकम नतिर्नु पर्दा गुणस्तरिय काम हुने भएको हुनाले ऐलानी जग्गाबाट ग्राभेल झिकेको बताए ।