मलेठ - फोरम र राजपाको गठबन्धन बनाएर हिड्नुपर्छ : यादव

बिनय यादव, सिरहा, २३ फागुन । राजपा नेपालका अध्यक्ष मण्डलका सदस्य एवम् सांसद राजकिशोर यादवले फोरम र राजपाको गठबन्धन बनाएर अघि बढ्नुपर्नेमा जोड दिएका छन् ।

सप्तरीको मलेठ घटनामा ज्यान गुमाएकाहरुको स्मृतिमा आयोजित कार्यक्रममा बोल्दै सांसद यादवले मधेसी जनताको चाहना दुबै दल गठबन्धन भएर हिड्नुपर्ने रहेको बताए ।

उनले भने, 'हामीले गठबन्धन बनाएर अघि बढ्नुनै हाम्रो मुद्दाको आधा विजय हो ।’ समय र जनताको माग पनि यही नै रहेकोमा उनले जोड दिए । उनले अब विगतको गल्तीबाट पाठ सिकेर गठबन्धन बनाएर हिड्नुको विकल्प नरहेको थपे ।

यता, राजपा अध्यक्ष मण्डलका सदस्य राजेन्द्र महतोले केपी ओली नेतृत्वको सरकारलाई दुई तिहाई आवश्यक नै परेको हो भने आफूहरु सघाउन तयार भएको बताएका छन् ।

‘सरकारलाई दुई तिहाई चाहिएकै हो भने राजपा ओलीलाई सघाउन तयार छ । तर, दुई तिहाईको दम्भ हुनुहुँदैन । असन्तुष्ट पक्षको संविधान संशोधनलगायतका मागको सम्बोधन हुनुपर्छ ।’

यस्तै महतोले मलेठ घटनाका सहिदहरुको सम्मानमा ‘सहिद कल्याण कोष’ बनाइनुपर्ने पनि उनले बताए । मधेस आन्दोलनका क्रममा ज्यान गएको खण्डमा ५० लाख दिने भनि गरिएको घोषणालाई आफूहरुले नबिर्सिएको भन्दै महतोले उपयुक्त समयमा सो रकम दिइने आश्वासन समेत दिन भ्याए ।

यसैगरी प्रदेश नम्बर २ का कृषिमन्त्री तथा फोरमका नेता सैलेन्द्र शाहले मलेठका सहिदको सम्मानमा सहिद प्रतिष्ठान बनाइनुपर्नेमा जोड दिए । यसैगरी राजपाका जीतेन्द्र सोनलले घाइतेहरुको लागि विशेष परिचयपत्र बनाइनुपर्नेमा जोड दिए ।

मधेसी मोर्चाको आन्दोलनका बीच एमालेले गरेको मेची–महाकाली जागरण अभियान गर्दा गतवर्षको फागुन २३ गते मलेठ घटना भएको थियो । सो घटनामा सञ्जन मेहता, पीताम्बरलाल मण्डल, आनन्द साह, वीरेन्द्र महतो र इनरदेव यादवको प्रहरीको गोली लागेर ज्यान गएको थियो ।