युवती माथि सामूहिक बलात्कारको प्रयास

न्यूज ब्यूरो, सर्लाही । प्रदेश नम्बर २ सर्लाहीको गोडैता नगरपालिकामा एक युवती माथि सामुहिक बलात्कारको प्रयास भएको घटना बाहिर आएको छ ।

गोडैता नगरपालिका वडा नम्बर १२ मधुवनी स्थित खेतबाट काम गरेर घर फर्किरहेकी एक युवतिलाई स्थानीय ३ जना व्यक्तिहरुले सामुहिक बलात्कारको प्रयास गरेको भन्दै जाहेरी दिएको छ ।

गत जेष्ठ ३ गते सोमबार साँझ ७ बजे मधुवनी गाउँ निवासी महेन्द्र रायको छोरा वर्ष ३५ को सुरेन्द्र राय, सोही ठाउँ बस्ने शिवधारी रायको छोरा वर्ष ४० को जयलाल राय र भारतको विहार राज्य जिल्ला सितामढी थाना मेजरगंज ग्राम पंचायत विश्वम्भरपुर ननकार बस्ने मोतीलाल माझीको छोरा अन्दाजी वर्ष २० को धर्मेन्द्र माझीले आफूलाई सामूहिक बलत्कारको प्रयास गरेको पिडितले आरोप सहित जाहेरी दर्ता गराएकी हुन् ।

सोमबार अपराह्न ५ बजे गाउँदेखि पुर्व भारतको बोर्डरसम्म (सिमानाका) जाने गोरेटो बाटोको छेउमा रहेको आफ्नो खेतमा काम गर्न गएको र सोही दिन साँझ ७ बजेको समयमा आफ्नो घरतर्फ फर्किरहेको अवस्थामा बाटोमा पहिल्यैदेखि लुकीछिपी बसीरहेका तीनै जनाले बलात्कार प्रयास गरेको आरोप लगाइएको छ ।

“मलाई रोकेर अभद्र व्यवहार र बोलीवचन दिन थालेको तर उनीहरूको कुरा नसुनी केही नबोली अगाडी बढ्न लाग्दा अगाडीबाट आएर बाटो छेकेर मेरो मन्जुरी बगैर बल जबर्जस्ती चारैतिरबाट घेरा हाली भाग्न उम्कन कुनै मौका नदिई करणी गर्ने नियतले हातखुट्टा समाती मुख थुनेर लछारपछार गरी घिसार्दै नजिकैको आलीको भित्तामा लगेर अर्धनग्न पारेर करणी गर्ने प्रयास गर्न थालेपछि आफुलाई बचाउन जोरजोरले कराउन सुरु गरे पछि खेतम काम गरेर आ–आफ्नो घरतर्फ फर्किरहेका गाउँलेहरु आवाज सुनेर मलाई बचाउन होहल्ला गर्दै ती तीनैजना उपर हमला गरेपछि उनीहरू आफुलाई छाडेर भागेको थियो ”– युवतिले आफ्नो बयानमा भनेकी छिन् ।

बलात्कारको प्रयासमा संलग्न सुरेन्द्र राय अवैध घरेलु मदिराको कारोबारी रहेको र घरमै सानो होटल चलाएर भारतबाट आउने ग्राहकहरुलाई मदिरा बिक्री गर्ने गरेको स्थानीयले बताएको छ ।

पिडितको आमाबुबाले आफनो छोरीमाथि अमर्यादित यौन दुर्व्यवहार गरि समाजमा रहेको मान सम्मान र ईज्जत प्रतिष्ठामा आँच पुर्याएका ती तीनैजना व्यक्तिहरुको खोजतलास र पक्राउ गरि कानुनी अनुसारको हदैसम्मको दण्ड सजाय गरि क्षतिपूर्ति समेत दिलाउन माग गर्दै शुक्रवार दिउँसो कसुरवार दुईजना स्थानीय र एकजना भारतीय नागरिक उपर सदरमुकाम मलंगवा स्थित जिल्ला प्रहरी कार्यालय सर्लाहीमा जाहेरी दिएकी छिन ।

बलत्कार जस्तो घटनामा समेत आफूमाथि स्थानिय स्तरमा मिलापत्रको लागि राजनितिक दबाब आएपनि नेपालको संविधान अनुसारको न्यायको लागि हामी जिल्ला प्रहरी कार्यलयमा जाहेरी दिएको पिडितको बुबाले बताए ।

कोरोना भाईरसको विश्वव्यापीका कारण आम नागरिक अक्रान्त र देशमा लकडाउन भएको बेला समेत बलत्कार जस्तो जघन्य अपराध घटनु दुर्भाग्य रहेको मानवअधिकारकर्मी मुकेश मिश्रले बताए ।

घटनाको सत्यतथ्यको छानविन गरी दोषी जो कोहीलाई कानुनको दायराभित्र ल्याई कडा कर्वाहीको माग गरेको र प्रहरीले घटनाको छानविनमा ठोस कदम चालेन भने हामीहरु आन्दोलन गर्न बाध्य हुने समेत दुखेसो पोखे ।

बलात्कारको घटना सत्य भएको र बलत्कारमा संलग्न बारे आफू छानविन गरिरहेको वडा नम्बर १२ का वडाअध्यक्ष सम्भुनारायण कुशवाहाले बताए ।

भारत विहारमा रक्सीमा प्रतिबन्ध भएका कारण लकडाउनको बाबजुद लुकिछिपी पारीबाट दिनहुँ भारी संख्यामा भारतीय नागरिकहरु सिमाक्षेत्रका गाउँमा आएर अबेर रातीसम्म रक्सी खाएर होहल्ला गर्ने, मारपिट गर्ने, स्थानीय महिलाहरु उपर अपशब्द प्रयोग गर्ने तथा अभद्र व्यवहार जस्ता कार्यहरु गर्दै आएका छन ।

दिनहु भारी संख्यामा रक्सी पिउने भारतीय नागरिकहरुको गाउँमा प्रवेश चोरी, डकैती, लुटपाट बलत्कार जस्तो अपराधिक क्रियाकलाप र असमाजिक गतिविधि दिनप्रतिदिन बढदै गएपनि सिमाना क्षेत्रमा संचालित अवैध रक्सी पसल संचालनमा रोक लगाउन स्थानिय सरकार तथा प्रशासन मौन देखिन्छ ।