जनकपुरमा क्लोथ बैँकको भवन निर्माण कार्य रोक्का, अध्यक्ष भन्छन् -'राजनीतिक पावरको दुरुपयोग'

न्यूज ब्यूरो, जनकपुरधाम । जनकपुरधामस्थित क्लोथ बैँकको निर्माण हुन लागेको भवन स्थानीय प्रशासनले रोक्का गरिदिएको छ । भवन अवैद्यानिक रुपमा निर्माण हुन लागेको भन्दै रोक्का गरेको हो ।

प्रदेश नम्बर २ को अस्थायी राजधानी जनकपुरधाममा रहेको एतिहासिक तथा धार्मिक धरोहर तिरहुतिया गाछीको जग्गा अतिक्रमण गरि अवैधानिकरुपमा निर्माण गर्न लागिएको भन्दै नगर प्रहरीले निर्माण समाग्रीहरु समेत जफत गरेको हो ।

यूवा अभियन्ता सुशिल कर्णले ऐतिहासिक धार्मिक धरोहर जग्गा अतिक्रमण गरि भवन निर्माण भईरहेको भन्दै जनकपुरधाम उपमहानगरपालिकामा अवैधानिक भवन निर्माण कार्य बन्द गराउनका लागि निवेदन दिएका थिए ।

गुठी संस्थानको अधिनस्थ रहेको तिरहुतिया गाछीको जग्गामा भवन निर्माणका लागि स्वीकृती नलिएको र जनकपुरधाम उपमहानगरपालिकाको कार्यालयबाट भवनको लागि नाप नक्सा समेत नभएको भन्दै जनकपुरधाम उपमहानगरले अवैधानिक भवन निर्माण कार्य रोेक्नका लागि जिल्ला प्रहरी कार्यालय धनुषालाई पत्राचार गरेपछि क्लोथ बैँकको भवन निर्माण कार्य रोकिएको हो ।

भवन निर्माण कार्य रोक्नका लागि पत्राचार गरेको करिब एक साता पछि भवन निर्माण गरिरहेको बेलामा धनुषा प्रहरी र जनकपुरधाम उपमहानगरको नगर प्रहरीले ३० बोरा सिमेन्ट, बालुवा सिमेन्टर मिलाउने मिक्सर मसिन एक थान र भवन निर्माण कार्यका लागि रहेको प्राविधिक औजार समेत भवन निर्माण स्थलबाट उठाएर लगेको छ ।

पटक–पटक अवैधानिक भवन निर्माण नगर्न भन्दाभन्दै पनि निर्माण कार्य नगरेकाले ति सामग्रीहरु जफत गरिएको धनुषा प्रहरीले जनाएको छ ।

धनुषा प्रहरी उपरिक्षक प्रकाश रानाभाटले अवैधानिकरुपमा भवन निर्माण गरिहेको भनि जनकपुरधाम उपमहानगरबाट सूचना प्राप्त भएपछि ३० बोरा सिमेन्ट, भवन निर्माणमा प्रयोग हुने प्राविधिक औजार र भाडामा ल्याइएर प्रयोग गरिरहेको मिक्सर मसिन नियन्त्रणमा रहेको बताए ।

क्लोथ बैंक धनुषाको अध्यक्ष समेत रहेका जसपा नेता राजिव झाले ऐतिहासिक तथा धार्मिक तिरहुतिया गाछीमा अवैधानिकरुपमा दुई कोठी पक्की भवन निर्माण गर्दै छत ढलान गरिरहेको कार्य गरिरहेको अवस्थामा धनुषा प्रहरी र जनकपुरधाम उपमहानगरपालिकाको कार्यालयले सामग्रीहरु जफत गरि नियन्त्रणमा लिएको यूवा अभियन्ता सुशिल कर्णले बताए ।

यता, क्लोथ बैँकका अध्यक्ष राजीव झाले भवन निर्माण कार्य वैद्यानिक रुपमै भइरहेको भएपनि नगरपालिकाले नै सत्ताको आडमा भवन निर्माण रोकेको बताएका छन् । गुठी सँस्थानको अधिनश्थ रहेको कित्ता नम्बर २५ मा अन्य भवनहरु पनि बनेको जनाउँदै उनले यसमा राजनीतिक पावरको दुरुपयोग भएको आरोप लगाए ।

गुठी सँस्थानको कित्ता नम्बर २५ मै नेपाल पत्रकार महासँघ धनुषा शाखाको भवन, शुक्रबारी बजार, वडा कार्यालय, पाउँरोटी फ्याक्ट्रीहरु समेत निर्माण हुँदा कोही नबोल्नेहरु समाजिक कार्य र सेवामा जुटेको सँस्थामाथिको आक्रोस मात्र पोखेको गुनासो गरे ।

सो जमिन तिरहुतियागाछीको नभएको र आफू सबै प्रक्रिया पुरयाएरै भवन निर्माण कार्य अगाडी बढाएको दाबी अध्यक्ष झाको छ । उनका अनुसार, गुठी सँस्थानका प्रमुख कोरोना पोजिटिभ भएपछि तत्कालै अनुमति लिन कठिनाई भएको अवस्थामा केन्द्रबाट अनुमति लिएको बताए ।

झाले भने, –“हामी सबै प्रक्रिया पुरयाएर जनकपुरधाम उपमहानगरपालिकाको कार्यालयमा बुझाएका छौं, सबै कागजातहरु नक्सा पासको लागि बुझाएकै छौं, कोरोनाको लहरले स्थिति बिग्रेपछि समयमा नक्सा पास नभएको मात्र हो, तर नक्सा पास हुने सबै कागजात दिएर तत्काल भवन बनाउन सुरु गरेका थियौं । राजनीतिक पावर देखाउनलाई भवन निर्माण रोकेको हो । अन्य केही छैन् ।”

केही दिनमै क्लोथ बैँकले आफ्नो छाप बनाउन सफल भएको भन्दै यही सफलता केही जनालाई अपाच्य भएपछि प्रहरीलाई समेत गुमराह गरेको सुनाए । उनले भने, –“यदी हामी सत्यको मार्गमा छौ र त्यो अवैद्यानिक छैन भने भवन केही दिनमै बन्छ, यो कुरा सबैले लेखेर राखुन ।”

यसका साथै अध्यक्ष झाले मिथिला नाटयकला परिषदको भवन, मैथिली बिकास कोषको बन्दै गरेको भवन सहित दर्जनौ भवनहरु अवैद्यानिक र बिना नक्साकै बनेको भन्दै सबैको हिसाब हुने चेतावनी समेत दिए ।

क्लोथ बैँक धनुषाले महामारीको समयमा अहिले जनकपुर सहित अन्य ठाउँमा अक्सिजन पुरयाउनेदेखि लिएर अन्य सहयोग समाग्रीहरु पुरयाउने गरेको छ ।