सिरहाको लहानमा गाई काटेपछि स्थानीयहरु तातिए, खातुन र किस्मत पक्राउ

न्यूज ब्यूरो, सिरहा । प्रदेश नम्बर २ को सिरहा जिल्लास्थित गाई काटेर खाएपछि स्थानीयहरु तातिएका छन् । राष्ट्रिय जनावरको रुपमा रहेको गाईलाई काटेपछि स्थानीयहरु आक्रोसित भएका छन् ।

सिरहाको लहान नगरपालिका वडा नम्बर २ मिलन चौकस्थित गौ हत्या भएको भन्दै स्थानीयले चर्को विरोध गरेका छन् । मुस्लिम समुदायको एक परिवारमा आईतबार बेलुका मासु प्रयोजनको लागि गाई काटेको भन्दै स्थानीयहरुले विरोध गर्दै आक्रोसित भएका छन् ।

स्थानीय एकजनाले प्रहरीलाई गाई काटेको सम्बन्धी दिएको सूचनाको आधारमा इलाका प्रहरी कार्यालय लहानले घटनास्थल पुगेका थिए । तर, प्रहरी पुग्ने खबर पाए लगत्तै घरमुली (घरपट्टि) फरार भएपनि उनको पत्नी र सालोलाई लाहान प्रहरीले नियन्त्रणमा लिएका छन ।

इलाका प्रहरी कार्यालय लहानले गाई काटेर खाएको आरोपमा बर्ष ३० की सहजादी खातुन र बर्ष २० का मो. किस्मतलाई पक्राउ गरी अनुसन्धान प्रक्रिया अगाडी बढाएको हो । केहिले गौ हत्या गरिनु भनेको धार्मिक सदभाव बिथोल्ने प्रयास भएको बताएका छन ।

ईप्रका लाहानका ईन्चार्ज डिएसपी डा.तपन दाहालले यस विषयमा थप अनुसन्धान भईरहेको र जाहेरी आएपछि मुद्दा चलाउने बताए ।

गाई वा गोरु हत्या गरेको खण्डमा १२ बर्षसम्म जेल सजायको व्यवस्था कानुनमा रहेको छ । अन्य जना भने यसै प्रकरणमा फरार भएको तथा उनीहरुको खोजी कार्य भइरहेको बताइएको छ ।