'आरामको लागि मात्र घर आएको छु' : उदीत नारायण झा

न्यूज ब्यूरो ||

जनकपुरधाम, १७ फागुन । सँगीत दुनियाँका बादशाह मानिएका गायन लेजेण्ड उदीत नारायण झाले आरामको लागि मात्र आफ्नो घर आएको बताएका छन् ।

जनकपुरबाट गायक झाको पुख्र्यौली घर पुगेका न्यूज ब्यूरो टीमसँग छोटो कुराकानी गर्दै उनले मिडियाबाट टाढै बस्न चाहेको भने ।

घर बाहिर हुँदा व्यस्तता मात्र भएकोले दुई दशकपछि आफ्नो घर आउँदा आफ्नोपन महसूस गरेको बताए ।

यसपालीको होली आफ्नै जन्मस्थलमा खेल्ने बताउँदै उनले आफ्नो गाउँमा स्वर्गझै अनूभूति भएको सुनाए ।

एक सातासम्म आफ्नो पुरानै घरमा बस्ने भएपछि झाको जन्मथलो रहेको घरको रँगरोगन पनि गरिरहेको देखियो ।

एक साताको बसाईमा यहाँ स्थित आफ्ना पुराना मित्र, आफन्त तथा ईष्टमित्रहरुसँगको भेटघाट मात्र लक्ष्य रहेको थपे ।

गायन क्षेत्रमा लेजेन्ड मानिएका उदीत नारायण झा लाई भेटघाट गर्नको लागि घर बाहिर भीड त्यतिकै देखिएको थियो ।

मिडियासँग कुनै पनि प्रकारको अन्तरवार्ता वा टिप्पणी दिनै नदिने अडान लिएका झाले जनकपुरका न्यूज ब्यूरो टीम आएको तथा यतिको दुरीबाट आएको भन्दै केही समय मिलाएका थिए ।

उनले भने, 'म अहिले मिडियाबाट टाढै बस्न रुचाउँछु, यहाँ आरामको लागि मात्र आएको छु, मलाई आराम चाहिएको छ, फेरी मुम्बई गएपछि कार्यव्यस्तता हँुदा कहिले यस्तो पल आउँला नआउँला भनेर मात्र आराम गर्न लागेको छु, अन्यथा नलिनुहोला |'

जनकपुरमा होलीको पूर्वसन्ध्यामा भोजपुरी सीने जगतका सुपरस्टार अभिनेता निरहुआ, अभिनेत्री आम्रपाली दुवे र सीमा सिँह आएको भन्दा गायक झाले निरहुआलाई वास्तवमा धेरै राम्रो अभिनेता भएको भन्दै प्रंशसा गरे ।

जनकपुर आएर जानकी मन्दिरमा जानकी दर्शनको सन्दर्भमा कुरा गर्दा उनले समय मिलेपछि निकट भविष्यमै जनकपुरमा जानकी मन्दिरमा दर्शन पूजा गर्नको लागि जनकपुर आउने आश्वासन दिए ।