जनकपुरः तीव्र गतिमा रहेको दुई मोटरसाईकल एक-आपसमा ठोक्किदाँ दुई युवकको मृत्यू

न्यूज ब्यूरो, जनकपुरधाम । प्रदेश २ को अस्थायी राजधानी जनकपुरधामदेखि केही दुरीमा रहेको उत्तरी धनुषामा मोटरसाईक दुर्घटना हुँदा दुई युवकको मृत्यू भएको छ ।

आईतबार (आज) दिउँसो करिब १ बजेको समयमा धनुषा जिल्लाको मिथिला नगरपालिका वडा नम्बर ८ कुसुमविसौना स्थित तीव्र गतिमा रहेको दुई मोटरसाईकल एक आपसमा ठोक्किदाँ दुर्घटना भई दुई युवकको मृत्यू भएको जिल्ला प्रहरी कार्यालय धनुषाले जनाएको छ ।

प्रदेश २–०२–००२ प ६०३६ नम्बरको मोटरसाइकल र प्रदेश २–०२–००३ प २८७७ मोटरसाइकल तीव्र गतिमा रहेको र नियन्त्रण नहुँदा ठोक्किन पुगेको प्रहरीको प्रारम्भिक अनुसन्धानबाट खुलेको जनाइएको छ ।

सो मोटरसाईकल दुर्घटनामा परी दुवै मोटरसाइकलको चालकको मृत्यु भएको छ । मृत्यु हुनेमा स्थानीय २० वर्षका भोला महतो र वर्ष २६ का सुनिल शर्मा रहेको जिल्ला प्रहरी कार्यालय धनुषाका प्रहरी प्रवक्ता मकेन्द्र मिश्रले जानकारी दिए ।

सोही दुर्घटनामा परी एक युवकको अवस्था गम्भिर भएको प्रहरीले जनाएको छ । प्रदेश २–०२–००३ प २८७७ नम्बरको मोटरसाइकलमा पछाडी सवार वर्ष २५ को सन्तोष महतोको अवस्था अझै गम्भीर रहेको प्रहरीले जनाएको छ । उनको उपचार मोडेल अस्पताल लालगढमा भइरहेको छ।

दुर्घटनामा गम्भीर घाइते दुवै युवकलाई जनकपुर लग्ने क्रममा एकजना युवकको बाटोमै र अर्का युवकको जानकी हेल्थकेयरमा पुगेपछि मृत्यु भएको प्रहरीले जनाएको छ।

दुवैजनाको शव पोस्टमार्टमको लागि प्रादेशिक अस्पताल जनकपुर ल्याउने तयारी भइरहेको तथा घटनाको विषयमा थप अनुसन्धान भइरहेको प्रहरीले जनाएको छ।