प्रदेश २ को राजधानीले पायो प्रवेश, नाम आगामी १४ गते

न्यूज ब्यूरो, जनकपुरधाम । शुक्रवार बसेको प्रदेश २ को प्रदेश सभा बैठकमा प्रदेशको राजधानीको विषयले प्रवेश पाएको छ । प्रदेशको नामको विषयमा भने आगमी बैठकमा छलफल हुने एमाले संसदीय दलका नेता शत्रुधन महतोले जानकारी दिए ।

उनले भने, ‘प्रदेशको नाम र राजधानीका लागि दर्ता भएका प्रस्तावहरु प्रस्तावकहरुबाट पेश गर्ने र समर्थकहरुले समर्थन गर्ने काम भयो । तर राजधानीका विषयमा मात्र प्रस्तावकहरुबाट प्रस्ताव पेश भएको छ ।

प्रदेशको नामको विषयमा भने १४ गते वस्ने प्रदेश सभाको तेश्रो बैठकमा प्रस्ताव पेश हुने र समर्थकहरुले समर्थन गरेपछि छलफल हुन्छ’ । बैठकमा बोल्ने अधिकांश सांसदहरुले प्रदेश सभा गठन भएको तीन वर्ष बढी भईसक्दा पनि नाम र राजधानीको टुंगो लगाउन नसक्नु सरकार र सांसदको समेत असक्षमता नामाकरण र राजधानी तोक्न अधिकांश सांसदले जोड दिएका छन् ।

प्रदेशको नाम र राजधानीका लागि प्रदेश सभामा १३ओटा प्रस्ताव दर्ता भएको छ । जसमा नामका लागि ६ र राजधानीका लागि ७ ओटा नाम प्रस्ताव भएका छन् । प्रदेश सभामा पेश भएकामध्ये दुई जनाले वीरगञ्जलाई प्रदेशको राजधानी बनाउनु पर्ने प्रस्ताव दर्ता गराएका छन् ।

त्यस्तै समासामायिक विषयमा प्रदेश सभा बैठकमा बोल्ने अधिकांश सांसदहरुले सरकारको कडा आलोचना गरेका छन् । उनीहरुले विभिन्न विषयमा सभामुखमार्फत सरकारको ध्यानाकर्षण गराएका हुन् । पछिल्लो समय कोरोनाको कहर तिब्र रुपमा बढेको भएपनि प्रदेश सरकारले त्यसको तयारी नगरेको प्रति उनीहरुले ध्यानाकर्षण गराए ।

उनीहरुले प्रदेश पारवाहन अन्तर्गतका बसहरु सञ्चालन गर्न नसकेको, प्रदेश २ का सडक र सवारीहरुको अवस्था जीर्ण हुँदा त्यसले अत्यधिक दुर्घटना निम्त्याएको, जनता आवास कार्यक्रम अन्तर्गतको बजेट रोकिएको लगायतका विषयमा धाराणा राखेका हुन् ।

त्यस्तै आफूखुसी कर्मचारीहरुको सरुवा गर्ने गरेको कारण सरकारको काममा ढिलासुस्ती भएको विषयमा समेत उनीहरुले सभामुख मार्फत सरकारको ध्यानाकर्षण गराएका छन् ।

---

यो समाचार जनकपुरबाट प्रकाशित हुने टुडे एक्सप्रेस दैनिकमा प्रकाशित छ ।