अब जनकपुर सहित धनुषा जिल्लाभरि बजार बिहान र बेलुका ३/३ घण्टा मात्र खुल्ने

न्यूज ब्यूरो, जनकपुरधाम । जिल्ला सँकट व्यवस्थापन समितिले जनकपुर सहित धनुषा जिल्लाभरिको हाट बजारहरु दैनिक रुपमा ६ घण्टा मात्र खोल्ने निर्णय गरेको छ । पसलहरु भने पूर्ण रुपमा खुल्ला रहने छ भने तरकारी, पेठिया बजारहरुमा सिन्डीकेट लागू गरिएको छ ।

मँगलबार बसेको समितिको बैठकले जिल्लाको विभिन्न स्थानमा हुने र भईरहेको हाट बजारहरुमा अत्यधिक भीडभाड हुने हुँदा बजार केन्द्र भन्दा अलि खुल्ला स्थानमा मापदण्डको पालना सहित बिहान ३ घण्टा र बेलुका ३ घण्टा खोल्न पाइने निर्णय गरिएको हो ।

निर्णय अनुसार, बुधबारदेखि नै लागू हुने गरी बिहान ७ बजेदेखि १० बजेसम्म र अपरान्ह ४ बजेदेखि बेलुकी ७ बजेसम्म मात्र सञ्चालन गर्न निर्ण गरेको हो । यी समयलाई उलँघन गरेको वा नगरेको सम्बन्धमा सम्बन्धित स्थानीय तह तथा प्रहरीले अनुगमन गर्ने निर्देशन समेत दिएको हो ।

विश्वभरी फैलिँदै गईरहेको नयाँ भेरियन्ट सहितको कोरोना महामारीको नेपालमा समेत संक्रमण बढ्दै गएको अवस्थालाई दृष्टिगत गर्दै स्थानीय प्रशासनले जनकपुर सहित धनुषा जिल्लाको विभिन्न स्थानमा लाग्ने हाट बजार सहित पसलहरुमा समेत सो निर्णय लागू गर्न भनिएको हो ।

सेवाग्राहीहरुको अत्यधिक भीडभाड हुने सरकारी कार्यालयहरुमा भीडभाड कम गरी संक्रमण जोखिम न्युनिकरण गर्न अनलाइन लगायतका अन्य वैकल्पिक प्रणालीको उपयोग गर्ने, स्थानीय तह अनुसार आलोपालो प्रणाली लागु गर्ने, नेपाल सरकारले तोकेका स्वास्थ्य सुरक्षाका मापदण्ड कडाईका साथ कार्यान्वयन गर्ने निर्णय गरिएको हो ।

विद्यालय, क्याम्पसलगायत शिक्षण संस्थाको सम्बन्धमा नेपाल सरकारको बैशाख ६ गतेको निर्णयमा आधारित भई संक्रमणको विद्यमान अवस्था र जोखिमको विश्लेषण गरी वैशाख मसान्तसम्म विद्यालयहरु बन्द गर्ने तथा परीक्षा सुरु भइसकेको अवस्थामा स्वास्थ्य मापदण्डको पालना गरी वैशाख १० गते भित्र सम्पन्न गर्ने व्यवस्था मिलाउने निर्णय भएको धनुषाका प्रमुख जिल्ला अधिकारी (सिडिओ) बन्धु प्रसाद वास्तोलाले जनाए ।

प्रादेशिक कोभिड–१९ प्रयोगशाला जनकपुरधाममा जनशक्तिको न्यूनता भएको कारण पिसिआर परिक्षणको दायरा बढाउन कठिन भएकोले थप जनशक्तिका लागि उक्त ल्याबबाट प्रस्ताव भएका अत्यावश्यक पदहरुको पूर्ति गरी परिक्षणलाई प्रभावकारी बनाउन सामाजिक विकास मन्त्रालयलाई अनुरोध गर्ने निर्णय समेत गरिएको हो ।

धनुषाको स्थानीय तहको सीमानाका भारतसँग जोडिएको हुनाले सीमानाकामा अनिवार्य रुपमा हेल्प डेस्क स्थापना गरी संचालनमा ल्याउने तथा आवश्यकता अनुसार होल्डीङ सेन्टरको व्यवस्था गर्ने निर्णय भएको छ ।

साथै उपमहानगरपालिकालाई ३०, नगरपालिकालाई २० र गाउँपालिकालाई कम्तिमा १५ वटा आइसोलेशन बेड तथा क्वारेन्टिनको व्यवस्था गराउने निर्णय भएको जनाइएको छ ।

बैठकले गरिव, विपन्न, श्रमिक, मजदुर, ज्येष्ठ नागरिकलाई निशुल्क मास्कवितरणको अभियानका लागि उद्योग वाणिज्य संघ, चेम्बर अफ कमर्स, गैसस, धार्मिक, सामाजिक र परोपकारी संघसंस्थाहरुलाई अनुरोध गर्ने तथा बजारमा मास्क, सेनिटाइजर, कोभिड–१९ मा प्रयोग हुने औषधीहरु सहुलियतपूर्ण दरमा उपलब्ध गराउने, कालोबजारी र अभाव हुन नदिन उद्योग वाणिज्य संघ धनुषा र नेपाल केमिस्ट ड्रग एशोसिएसनले संयोजन र समन्वय गर्ने निर्णय समेत गरिएको छ ।

जनकपुरको प्रयोगशालामा जनशक्ति कम भएको भन्दै पिसिआरको दायरा बढाउनको लागि ३६ जना कर्मचारीलाई करार सेवामा राख्ने निर्णय गरिएको हो । प्रदेश २ को समाजिका विकाश मन्त्रालयले सोको व्यवस्थापन गरिने जनाइएको छ ।