प्रदेश २ः स्थानीयको कन्चटमा प्रहरीको बन्दुक, प्रहरीको गाली– 'के भनिस् रे मा..क्ने' !

न्यूज ब्यूरो, जलेश्वर । प्रदेश नम्बर २ को महोत्तरी जिल्लास्थित एक प्रहरी अधिकारीले गाउँ पसेर स्थानीयको कन्चटमा बन्दुर तेर्साउँदै तर्साएका छन् ।

महोत्तरी जिल्लाको महोत्तरी गाउँपालिका वडा नम्बर २ स्थित रहेको बजार नजिकै घरको ढलान गरिरहेको अवस्थामा प्रहरीले स्थानीयको कन्चटमा बन्दुक राखी अपशब्द र जथाभावी गाली गलौच गरेका हुन् ।

घरको ढलान बिहानैदेखि साँझसम्म गरिरहँदा कसैको उक्साहटमा प्रहरीले स्थानीय एक जनाको ढलान रोक्न पुगेको आरोप छ । ढलान नरोकेको भन्दै प्रहरीले पिस्तोल निकालेर स्थानीय मिथिलेश देवी र संजिब कापरको कंचटमा बन्दुक राखी शैलेन्द्र कापरलाई कुटपिट गरेको आरोप छ ।

बिहानदेखि सुरु भएको घरको ढलानमा अबेर भएको बताउँदै मिथिलेश देवीले आफ्नो नीजि घरको ढलान रोक्न जाँदा आफूहरु प्रतिकार गरेपछि छोराहरुलाई कन्चटमा बन्दुक राखेर गालीगलौज गरी दादागिरी देखाएको आरोप लगाएकी हुन् ।

समुदायिक साँझेदारी प्रहरी कार्यक्रम अन्तर्गत नेपाल प्रहरीले समुदायसँग समन्वय गरी सभ्य समाजको निर्माणमा सहयोग गर्ने प्रतिवद्धता जाहेर गरेपनि प्रहरी अधिकारीको यस्तो आचरणले महोत्तरी प्रहरीको कार्यसम्पादन र सुरक्षाप्रति प्रश्न चिन्ह खडा भएको छ ।

राती दुई जना प्रहरी ढलान रोकाउन गएका थिए । महोत्तरी गाउँपालिकाको महोत्तरी गाउँस्थित रहेको प्रहरीचौकीका असई र एक प्रहरी हबल्दार ढलान रोकाउन गएका थिए । ढलान रोकाउने कारण के थियो भनेर अझै प्रष्ट छैनन् ।

स्थानीयहरुका अनुसार, केही राजनीतिक पहुँच भएका व्यक्तिले आफ्नो दम्भ देखाउनको लागि मात्र प्रहरीको सहारा लिएर ढलान रोकाउन गएको आरोप लगाएका छन् । उनीहरुले घरको ढलान रोक्न भनेपछि कापर परिवारले नमानेपछि बन्दुक तेर्साउँदै 'मा..क्ने' जस्ता शब्दहरुले गाली गरेको भिडियो पनि सार्वजनिक भएको बताएका छन् ।

यस सन्दर्भमा जिल्ला प्रहरी कार्यालय महोत्तरीका प्रहरी प्रवक्तासँग ९८५४०९०१६१ मा सम्पर्क गर्दा फोन उठेनन् ।