भोली प्रदेश २ को यी दुई जिल्लामा 'सार्वजनिक विदा' को घोषणा

न्यूज ब्यूरो, जनकपुरधाम । प्रदेश नं. २ को दुई जिल्लामा भोली विहिबार एक दिने सार्वजनिक विदाको घोषणा गरिएको छ ।

बैशाख १ गते देशैभरि सार्वजनिक विदा दिएको सरकारले प्रदेश नम्बर २ को दुई जिल्लामा सिरुवा पर्वलाई मध्यनजर गर्दै एक दिने थप सार्वजनिक विदा दिने घोषणा गरेको हो ।

गृह मन्त्रालयले प्रकाशित गरेको एक सूचनामा नेपाल सरकारको राजपत्रमा प्रकाशित भए अनुसार विहिबार सिरुवा–पावनी पर्व पर्न गएकोले सिरहा र सप्तरीमा सार्वजनिक विदा दिने भएको छ ।

२०७८ साल बैशाख देखि चैत्त महिनासम्म एक वर्षमा दिइने विदाको क्रममा २०७७ चैत्त ०९ गतेको राजपत्रमा प्रकाशित विदा अनुसार सिरुवा पर्व मनाउने प्रदेश नम्बर १ को झापा, मोरँग र सुनसरी तथा प्रदेश २ को सिरहा र सप्तरीमा एक दिने सार्वजनिक विदा विहिबार बैशाख २ गते दिने निर्णय गरेको हो ।

यी जिल्लाहरुका बासिन्दाहरु विशेष रुपले सिरुवा पर्व मनाउँदै आएको छ । तराईमा बस्ने आदिवासी समुदायले मनाउने सिरुवा पर्व शुक्रबारदेखि सुरु भएको छ । वैशाख १ गतेदेखि सुरु हुने यो पर्व तीन दिनसम्म चल्छ ।

पहिलो दिन एकआपसमा पानी छ्यापाछ्याप गर्दै पानी सिरुवा मनाइन्छ भने दोस्रो दिन माटोको हिलो बनाएर काद सिरुवा र तेस्रो दिन रङ खेलेर रङ सिरुवा मनाउने चलन छ ।

यो पर्वमा विभिन्न परिकार खाने र संस्कृति झल्कने नाचगान गर्ने चलन छ । झापा, मोरङ र सुनसरी जिल्लामा बस्ने राजवंशी, थारु, गनगाई, ताजपुरिया, माझीलगायतका जातिले सिरुवा मनाउने गर्छन् ।

पर्वको अवसरमा यी जिल्लाहरुमा विशेष सांस्कृतिक कार्यक्रमहरुसहित सिरुवा मेला पनि लाग्ने गर्दछ । भारतको आसाम, मेघालय, पश्चिम बंगाल र कोचबिहारमा पनि सिरुवा मनाइन्छ ।