जनकपुरमा आफ्नै घरमा झुण्डिएको अवस्थामा महिलाको लास, माईतीपक्ष भन्छन् -'हत्या' !

न्यूज ब्यूरो, जनकपुरधाम । प्रदेश २ को अस्थायी राजधानी जनकपुरधामस्थित एक महिला आफ्नै घरमा झुण्डिएको अवस्थामा फेला परेको हो ।

जनकपुरधाम उपमहानगरपालिका वडा नं. १४ मुजेलियामा एक महिला झुण्डिएको अवस्थामा भेटिएको हो । स्थानीय नरेश राउतकी अन्दाजी बर्ष २२ की श्रीमति कविता राउत आफ्नै घरमा झुण्डिएको अवस्थामा मृत भेटिएकी हुन् ।

आज विहान करिब ३ः३० बजेको समयमा सो घटना भएको स्थानीयहरुले बताएको छ । सो समयमा मृतकको श्रीमान नरेशले छिमेकीहरुलाई जानकारी गराएको बताइएको छ । त्यसपछि आफैं झुण्डिएकी कवितालाई छिमेकीहरुको सामुन्ने तल झारेको बताइएको छ ।

नरेशसँग कविताको राती झगडा भएको स्थानीयहरु बताएका छन् । उनको गएराती मात्र नभई दिनहुँ जसो कुनै कारणले झै–झगडा हुँदै आएको बताइन्छ । नरेशका अनुसार, झगडा भएको र आफू सुतेपछि आत्महत्या गरेकी हुन् ।

उनले आफू राती करिब साढे तीन बजेको समयमा पिशाब फेर्न उठेपछि कवितलाई झुण्डिएको अवस्थामा देखेको बताएका छन् ।

यता, कविताको माईती पक्षले भने कवितालाई उनको श्रीमान नरेशले कुटपिट गरी हत्या गरेर देखाबटी रुपमा झुण्डाएको आरोप लगाएका छन् । कविताकी भाई सिरीचन राउतले नरेशले हत्या गरी झुण्डाएको आरोप लगाएको छ ।

नरेशको अनुहार, गालामा नँगको निशानहरु छन् । उनीसँग कसैको हातावाही भएको र अनुहारमा नँगको घाउहरु देखिएको छ । तर, नरेशले भने यो एलर्जी भएको प्रतिक्रिया दिएका छन् ।

शवलाई पोष्टमार्टमको लागि जनकपुरको प्रादेशिक अस्पताल लगिएको छ भने प्रहरी यसको अनुसन्धान तीव्र पारेको छ ।