जनकपुरः ठगी मुद्दामा सजाएर पाएर भागेका महरान २१ बर्षपछि पक्राउ

न्यूज ब्यूरो, जनकपुरधाम । धनुषामा ठगी सम्बन्धी मुद्धामा कैद सजाय तोकिएका एक अभियुक्त पक्राउ परेका छन् ।

जिल्ला अदालत धनुषाबाट २०५६ साल असार ६ गते ठगी मुद्धामा १२ लाख २५ हजार १७० रुपैयाँ जरिवाना र २ वर्ष जेल सजाय तोकिएको एक अभियुक्त २१ वर्षपछि पक्राउ परेका हुन्। पक्राउ पर्नेमा साविक झिझा गाविस वडा नम्बर २ हाल जनकनन्दनी गाउँपालिका बस्ने विनोद महरान रहेका छन् ।

उनले विभिन्न मितिमा ठगी गरेको ठहर गर्दै जिल्ला अदालत धनुषाले २०५६ असार ६ गते सो मुल्य बराबरको जरिवाना र २ वर्ष कैद सजायको फैसला गरेको थियो। सोही मुद्धालाई पुनरावेदन अदालतले २०५८ साल चैत्र २६ गते सदर गरेको थियो ।

फैसला पछि फरार रहेका उनलाई प्रहरीले पक्राउ गरी जिल्ला अदालत बुझाएको हो । उनलाई सिन्धुली जिल्ला कारागार पठाइएको छ । अदालतको फैसला अनुसार उनले पक्राउ परेकै मितिबाट कैद भुक्तान गर्नु पर्नेछ भने फैसला अनुसारको जरिवाना नतिरे थप दश वर्ष जेल सजाय भुक्तान गर्नु पर्ने जिल्ला अदालत धनुषाको तहसिल शाखाले जनाएको छ ।