प्रदेश २ः आगलगी हुँदा ६ घर जलेर नष्ट, एक किशोरी पनि घाईते

न्यूज ब्यूरो, वीरगँज । प्रदेश नं. २ को पर्सा जिल्लास्थित आगलगी हुँदा ६ वटा घर जलेर नष्ट भएको छ भने सोही आगोमा एक किशोरी समेत घाइते भएकी छन् ।

पर्सा जिल्लाको ठोरी गाउँपालिका वडा नं. २ स्थित इच्छानगरका पहलमान प्रजा, कृष्णबहादुर नगरकोटी र रञ्जित नगरकोटीको घर तथा गोठ जलेर नष्ट भएको हो ।

आगलागीमा परी १५ वर्षीया शर्मिला नगरकोटी घाइते भएकी हुन् । घरमा आगलागी हुँदा घरभित्र रहेकी ७२ वर्षीया हजुरआमाको उद्धार गर्ने क्रममा शर्मिला घाइते भएकी हुन् । उनको स्वास्थ्य अवस्था सामान्य रहेको छ ।

आगलागीबाट घरभित्र राखिएको खाद्यान्न सहित गरगहना, लत्ताकपडाहरु जलेर नष्ट भएको छ । सो आगलगीमा १३ लाख बढीको क्षति भएको इलाका प्रहरी कार्यालय ठोरीका प्रहरी निरीक्षक अशोक साहले जानकारी दिए ।

घर नजिकै रहेको खेतबारीबाट सल्केको आगोले तीन घर र तीन गोठ जलेर नष्ट भएको उनले बताए । नेपाल प्रहरी, सशस्त्र प्रहरी र स्थानीयको सहयोगमा आगो नियन्त्रणमा लिइएको उनले बताए ।