जनकपुरमा डा. सिके राउतको शक्ति प्रदर्शन, 'जनमत सँग्रह' को मुद्दा जीवन्तै

न्यूज ब्यूरो, जनकपुरधाम । तराई मधेशमा वैकल्पिक शक्तिको रुपमा उदयमान भइरहेको डा. सिके राउत नेतृत्वको जनमत पाटीको प्रथम महाधिवेशनमा शनिबार जनकपुरमा शक्ति प्रदर्शन गरिएको छ ।

तराई मधेशको अन्य राजनीतिक दलहरुको तुलनामा डा. सिके राउतको जुनसुकै कार्यक्रममा जनसागर जहिले पनि भारी सँख्यामा हुन्छन् र सोही अनुसार आज जनकपुरमा जनसैलाव देखिएको छ ।

प्रथम महाधिवेशनको लागि तराई मधेशको २२ वटा जिल्लाहरुबाट हजारौंको सँख्यामा उनका समर्थकहरु, पार्टीका पदाधिकारी, कार्यकर्ता र हजारौं स्वयँमसेवहरुको भारी सँख्याले शक्ति प्रदर्शन गरिएको छ ।

जनकपुरको बाह्रविघा मैदानमा महाधिवेशनको औपचारिक उद्घाटन सत्र लगत्तै बन्दसत्र अहिले पनि जारी रहेको छ । सो क्रममा उनका समर्थकहरुले देखाएको क्रियाकलाप अनुसार अझै डा. राउतले जनमत सँग्रहको मुद्दालाई त्यागेका छैनन् ।

महाधिवेशन चल्दै गर्दा बाह्रविघा आसपास क्षेत्रमा सो पार्टीका कार्यकर्ताले झण्डासहित स्वतन्त्र मधेशको नारा लगाएको पाइयो । पाँच हजार प्रतिनिधि र २५ हजार स्वयं सेवकको उपस्थितिमा भएको महाधिवेशनमा कतिपय नेता तथा कार्यकर्ता ‘स्वतन्त्र मधेश’ लेखिएको झण्डा र नाराबाजीसहित कार्यक्रममा उपस्थित देखिए ।

जनमत पार्टीले जनमत संग्रहको माग गर्दै आएको छ । ११ बुँदे सम्झौतामा पनि जनमत संग्रह लेखाउन चाहेको थियो । तर सरकार पक्षले त्यो शब्द लेख्न नमानेपछि त्यसको ठाउँमा जन अभिमत लेखिएको हो ।

डा. सिके राउतप्रतिको क्रेज, जनमत पार्टीप्रतिको क्रेजको ज्वलन्त उदाहरण शनिबार जनकपुरमा हेर्न पाइएको हो । आफूलाई मधेशवादी दल भनाउनेहरु मधेशी जनतासँग सधै गद्दारी गर्दै आएको भन्दै अन्तिम विकल्पको रुपमा डा. राउतसँग आएको महाधिवेशनमा सहभागी एक समर्थकले भने ।

मधेशमा १० लाखको रोजगारी सृजना सहित रामराज्यको धारणालाई मूर्तरुप दिने सम्भावना डा. राउतमै भएको भन्दै यसअघिको दलहरुबाट दिक्क भएर डा. राउतसँगको पार्टीमा आएको बताए ।

अहिले बाह्रविघा मैदानमै बन्द सत्र जारी रहेको छ । डा. राउत पार्टीको अध्यक्षको लागि एक्लो उम्मेदवार छन् भने उपाध्यक्षको लागि ईन्जिनीयर बसन्त कुशवाहा, मो. अब्दुल खान लगायतका व्यक्तिहरुले उम्मेदवारी दिएका हुन् ।

जनमत पार्टीमा शिर्ष नेतृत्वदेखि कार्यकर्तासम्म प्रायः शिक्षित युवाहरु रहेका छन् । शिर्ष पदाधिकारीमा डाक्टर, ईन्जिनीयरहरु मात्र रहेका छन् ।