धनुषाको प्रत्येक निर्वाचन क्षेत्रमा यी सडकहरु पीच (कालोपत्रे) हुने

न्यूज ब्यूरो, जनकपुरधाम । शनिबार देशैभरिको १ सय ६५ सडकको प्रधानमन्त्री केपी शर्मा ओलीले सडक कार्यक्रमको शुभारम्भ गरेका छन् ।

सो क्रममा देशैभरिको लागि हरेक निर्वाचन क्षेत्रमा कम्तीमा १ वटा रोड बन्ने कार्यक्रम अन्तर्गत धनुषाको ४ वटा निर्वाचन क्षेत्रमा पनि १ १ सडक निर्माण हुने भएको छ ।

सो क्रममा धनुषाको निर्वाचन क्षेत्र नम्बर १ का प्रतिनीधिसभा सदस्य एवम् पूर्व मन्त्री मातृका प्रसाद यादवको निर्वाचन क्षेत्रमा धनुषाको हँसपुर कठपुल्लादेखि डाँडाटोलसम्मको सडक निर्माणको योजना प्रविष्ट गरिएको हो ।

१६५ वटै संघीय निर्वाचन क्षेत्रमा तीन वर्षभित्र एकएक पटक सडक बनाउने यो कार्यक्रमको प्रधानमन्त्री ओलीले बालुवाटारमा आयोजित विशेष समारोहमा स्वीच थिचेर शुभारम्भ गरेका हुन् ।

सोही क्रममा धनुषाको निर्वाचन क्षेत्र नम्बर २ का प्रतिनीधिसभा सदस्य उमा शँकर अडगरियाको निर्वाचन क्षेत्रको धनुषाको खजुरी चन्हादेखि माचि झिटकैया, नाथपट्टि हुँदै डुमरियासम्म कालोपत्रे (पिच) हुने कार्यक्रम राखिएको छ ।

सांसदहरुले स्थानीय पूर्वाधार विकास कार्यक्रममा ठूलो दरमा बजेट मागेपछि चालु आर्थिक वर्षको बजेटमा एक निर्वाचन क्षेत्रमा एउटा सडक बनाउने कार्यक्रम अघि सारेको थियो । यसका लागि ३ अर्ब २० करोड बजेट छुट्याएको छ ।

मन्त्रालयले बनाएको मापदण्डअनुसार एउटा निर्वाचन क्षेत्र भएको हिमाली जिल्लामा रु ६० करोड, एक निर्वाचन क्षेत्र भएका पहाडी जिल्लाहरुमा रु ५० करोड, दुई निर्वाचन क्षेत्र भएका २१ जिल्लाहरुमा प्रति सडक रु ४० करोडसम्म रकम छुट्याइनेछ ।

यस्तै तीन वा सोभन्दा बढी निर्वाचन क्षेत्र भएका २० जिल्लाहरुमा प्रति सडक रु २५ करोड र काठमाडौं जिल्लाका प्रति निर्वाचन क्षेत्र रु २० करोडसम्म दिइनेछ ।

सोही अनुसार, धनुषाको निर्वाचन क्षेत्र नम्बर ३ बाट निर्वाचित साँसद एवम् पूर्व मन्त्री राजेन्द्र महतोको क्षेत्रमा समेत २५ करोड रुपैयाँ विनियोजन गरिएको हो । सो निर्वाचन क्षेत्रको घोडघासदेखि देबडिहा, भररिया, धनौजी कटैया, गौरदाहा, तेतरिया, कनकपट्टि, कुम्हरौरा, थुमौनासम्मको ६ लेन सडकसम्म कालोपत्रेको सडक निर्माण हुने भएको छ ।

जसको लागि पनि २५ करोड रुपैयाँ बजेट विनियोजन गरिने भएको छ । सोही क्रममा निर्वाचन क्षेत्र नम्बर ४ बाट निर्वाचित एवम् पूर्व मन्त्री रघुवीर महासेठको निर्वाचन क्षेत्रको धनुषाको महेन्द्र राजमार्ग (पूर्वपश्चिम राजमार्ग) देखि हरिपुर–महेन्द्रनगर–हारसर प्रटोकीदेखि ठेराबजारसम्मको सडक निर्माण हुने भएको छ ।

यसरी १६५ वटा सडकको कुल २२१० किलोमिटर हुने र यसका लागि ५७ अर्ब १० करोड रुपैयाँ बजेट चाहिने मन्त्रालयको आंकलन छ ।