बीरगँज रक्सौल नाका भयो खुल्ला, अब भारतीय गाडी पनि नेपालमा चलाउन दिइने

न्यूज ब्यूरो, वीरगँज । कोरोनालाई लिएर उच्च सतर्कता अपनाएका नेपाल सरकारले भारतीय गाडीहरुलाई नेपाल प्रवेश रोक लगाएको थियो ।

कोभिड १९ संकट व्यवस्थापन केन्द्र (सीसीएमसी) ले नेपाल र भारतका बीचमा यातायात सञ्चालन गर्न मन्त्रिपरिषद्लाई सिफारिस गरेको छ ।

बिहीबार प्रधानमन्त्री तथा मन्त्री परिषद्को कार्यालयमा बसेको कोभिड १९ संकट व्यवस्थापन केन्द्र९सिसीएमसी० को बैठकले नेपाल र भारतबीचको यातायात सञ्चालन गर्नको निम्ति मन्त्री परिषद्लाई सिफारिस गर्ने निर्णय गरेको हो ।

नेपाल भारत मुख्य नाका वीरगन्ज लगायत यातायातका १३ वटा रुट बाट पूर्ववत् रुपमा यातायात सञ्चालनको निम्ति मन्त्रिपरिषद्लाई सिफारिस गरिएको सीसीएमसीका सचिव खगराज बरालले बताए ।

यात्रुहरुले पूर्ण रुपमा स्वास्थ्य मापदण्ड प्रयोग गर्नुपर्ने तथा ७२ घण्टा अगाडीको पिसिआर रिपोर्ट नेगेटिभ आएका हुनुपर्ने उनको भनाइ छ ।

त्यसैगरी बैठकले नेपाल भारत मुख्य नाका वीरगन्ज लगायत सिमानामा नेपाल तर्फ भन्सार तिरेर सञ्चालन हुने भारतीय नम्बर प्लेटका यातायातका साधन पनि चलाउन दिने सिफारिस गरेको छ ।

गत चैत्र ११ गतेदेखि नेपालका कोभिड १९ संक्रमणका कारण लकडाउन गरिएपछि नेपाल भारत यातायात हालसम्म ठप्प रहेको छ ।

यातायातका साधन ठप्प भएपनि वीरगन्ज लगायत सिमानाबाट हजारौँको संख्यामा दैनिक रुपमा आवत् जावत् भइरहेको सन्दर्भमा वीरगन्ज लगायत सिमानाबाट यातायातका साधन पनि चलाउनको लागि पहल गरिएको सीसीएमसीका सचिव बरालले बताए ।

सरकारले वीरगँज नाका पूर्ण रुपमा खुल्ला गरेपछि नेपाल भारतबीच चल्ने सवारी साधन समेत प्रक्रिया पुरयाएर चलाउन दिने भनेर सिफारिस गरिएको हो ।

कोभिडको कारण नेपाल भारत बोर्डरमा चारपाँग्रे सवारी साधन सहित अन्य सवारी साधनमा समेत रोक लगाएपछि व्यापार समेत चौपट्ट भएको थियो ।