नेपाल रेल्वेबाट खुल्ला तस्करी, तस्करलाई सशस्त्र प्रहरीको सहयोग, रेलको चालक कक्षसम्म तस्करको पहुँच

न्यूज ब्यूरो, जनकपुरधाम । जयनगर जनकपुरदेखि बिजलपुरासम्म चल्ने नेपाल रेल्वेबाट सशस्त्र प्रहरीको संरक्षणमा तस्करी भईरहेको पाईएको छ ।

पोकामा घरायसी समान ल्याउने सर्वसाधारणको समान खोस्ने सशस्त्र प्रहरी रेल्वे सुरक्षा बेसले तस्करलाई भने सम्मानपूर्वक व्यवहार गरी गन्तव्यसम्म पुरयाउने गरेको पाईएको छ ।

भारतको जयनगरबाट विभिन्न समानहरु ल्याएर नेपालको विभिन्न स्टेशन, हल्टमा झार्ने गरेको पाईएको छ । नेपाल रेल्वेमा एक नामुद महिला तस्करको रजगज चलेको छ । रेल्वेबाट हुने तस्करीको मुख्य नाईके मानिएकी ती महिला तस्करको पहुँच रेल्वेको संवेदनशिल कक्षसम्म रहेको पाईएको छ ।

रेल्वे सुरक्षा बेसका सुरक्षाकर्मीले महिनबारी बुझाउने तस्करलाई सम्मानपूर्वक स्कटिँग गरेर समान पुरयाईदिने गरेको पाईएको छ । न्यूज ब्यूरोले गरेको गोप्य अपरेशनको क्रममा रेल्वे सुरक्षा बेसका प्रहरीसँग मिलोमत्तो भएका व्यापारी, तस्करले समान राख्ने निश्चित बोगी छुटयाईएको हुन्छ ।

तस्विरमा कालो पहिरनमा रहेकी महिला तस्कर बताईन्छ । उनले रेलबाट हुने तस्करीको सिन्डीकेट चलाईरहेको नियमित यात्रा गर्ने केही सरकारी कर्मचारीहरु बताउँछन् । जनकपुरबाट विभिन्न पालिकासम्म आउजाउ गर्ने कर्मचारीहरुका अनुसार, तोकिएको तस्करको समान कहिलेकाही सशस्त्र प्रहरी आफैँ उठाएर राख्छन् भने गन्तव्यमा आफैँ फाल्ने पनि गरेको देखिएको छ ।

जयनगरबाट आउने तस्करीको आधा समान ईनरबा बोर्डरमै डाउनलोड गर्ने गरिन्छ । बाँकीका समानहरु जनकपुरसम्म पुरयाउने गरिन्छ ।

यस सन्दर्भमा रेल्वे सुरक्षा बेसका डिएसपी मनिकर्ण राईले भने रेल्वेबाट कुनै तस्करी भैनरहेको दाबी गरे । उनले आफ्ना कर्मचारीहरुलाई पूर्णरुपमा कडाईका साथ चेकजाँच गर्न निर्देशन बमोजिम नै भईरहेको बताए ।

रेल्वेका संवेदनशिल कक्षसम्म तस्करको पहुँच रहेको सन्दर्भमा डिएसपी राईले भने त्यो आफ्नो जिम्मेवारी नरहेको प्रष्टयाए । यद्यपी, रेल्वे सुरक्षा बेस रेलको सुरक्षाको लागि खटिएको बताईन्छ ।

रेलको संवेदनशिल कक्षबाट हुन सक्ने अराजक गतिविधि, हाईजैकिँग, संवेदनशिल बटन थिच्ने जस्ता घटनालाई मूर्तरुप दिन सक्ने सुरक्षा खतरा हँुदाहुँदै तस्करले भने कक्षसम्म पहुँच पाएको तस्विर हेर्न सकिन्छ ।

यस सन्दर्भा डिएसपी राईले भने यात्रुको अत्यधिक चापको कारण सो कक्षमा गएको हुन सक्ने बताए । चापकको कारण चालकका कोकपिटसम्म पहुँच सुरक्षाको दृष्टिकोणले अत्यन्त गम्भिर मानिन्छ ।

नेपाल रेल्वेका महाप्रबन्धक प्रवेश पराजुली भेटन चाहेनन् । समाचारको लागि खोजबिन भईरहँदा कर्मचारीहरुले जानकारी गराएपछि उनी कक्ष छाडेर बाहिर निस्के भने कुनै कर्मचारीले सम्पर्क नम्बर समेत उपलब्ध गराउन चाहेनन् । न्यूज ब्यूरोको सोधपुछ पछि रेल्वे सुरक्षा बेस र नेपाल रेल्वेको कर्मचारीहरु एक्टीभ भएका थिए ।

रेल्वेबाट हुने गतिविधिको बारेमा केही कर्मचारीहरुले समेत सरकारको सुरक्षा निकाय, हेलो सरकार, प्रधानमन्त्री कार्यालयमा उजुरी गरेको बताईएको छ ।