गृह मन्त्रालयले गर्यो एनप्याब्सन निलम्बन, अर्को निर्णय नभएसम्म संगठनका गतिविधि गर्न रोक

न्यूज ब्युरो, काठमाडौं । नेपाल सरकारले राष्ट्रिय निजी तथा आवासीय विद्यालय एसोसिएसन नेपाल (एनप्याब्सन) लाई निलम्बन गरेको छ ।

गृह मन्त्रालयले राष्ट्रिय निर्देशन ऐन, २०१८ बमोजिम जारी गरेको सार्वजनिक सूचनामार्फत एनप्याब्सनलाई अर्को निर्णय नभएसम्मका लागि निलम्बन गरिएको जनाएको हो ।

मन्त्रालयका अनुसार एनप्याब्सनले राष्ट्रिय निर्देशन ऐनको दफा ५ बमोजिम मन्त्रालयबाट जारी गरिएका निर्देशनहरू पटक–पटक पालना नगरेको तथा संगठनका पदाधिकारीहरूले सरकारबाट स्वीकृत विधान र संगठनको मूल उद्देश्यविपरीतका गतिविधिसमेत गरेको पाइएको छ ।

यस विषयमा मन्त्रालयले सम्बन्धित सरोकारवाला पक्षलाई २०८३ असार २३ गते छलफलका लागि बोलाई राष्ट्रिय निर्देशन ऐन, २०१८ तथा मन्त्रालयबाट २०८२ मंसिर १२ गते जारी निर्देशनबमोजिम काम गर्न आग्रह गरेको थियो । तर, उक्त निर्देशनअनुसार कार्य गरेको नदेखिएको मन्त्रालयको सूचनामा उल्लेख छ ।

निर्देशन पालना नगरेको भन्दै ऐनको दफा ५ बमोजिमको निर्देशन उल्लंघन भएको ठहरसहित दफा ६ को उपदफा (२) अनुसार एनप्याब्सनलाई अर्को निर्णय नभएसम्मका लागि निलम्बन गरिएको गृह मन्त्रालयले जनाएको छ ।

मन्त्रालयले सार्वजनिक गरेको सूचनामा निलम्बनपछि संस्थाको नाममा कुनै पनि समूह वा गुटबाट हुने गतिविधि गैरकानुनी हुने र प्रचलित कानुनबमोजिम कारबाही हुने चेतावनीसमेत दिएको छ ।

गृह मन्त्रालयले २०८३ कात्तिक १३ गते पहिलोपटक सार्वजनिक गरेको सूचनामार्फत यसबारे सम्बन्धित सबैलाई जानकारी गराएको हो ।