जानकी मन्दिरमा शेरको आँखाको हिरा खोज्दा बदनाम गराउन खोज्यो : युवा नेता यादव

न्यूज ब्यूरो, जनकपुरधाम । विश्वप्रसिद्ध जानकी मन्दिरमाथि रहेको शेर (बाघ) को आँखाको हिरा गायब भएपछि आफू चासो लिँदा बदनाम गराउन खोजिएको युवा नेता नविन यादवले बताएका छन् ।

जानकी मन्दिरको उत्तरी द्धारमा रहेको दुई वटा शेरको आँखामा करोडौंको हिरा रहेको र त्यो हिरा अहिले गायब भएको भन्दै आफू प्रश्न उठाएपछि आफूलाई बदनाम गराउन खोजेको बताएका छन् ।

केही महिनाअघि युवा नेता यादवले शेरको आँखाको हिरा र पौराणिक गहना, जेबारातहरु समेत चोरी भएको भन्दै खोजबिनको लागि माग उठाएका थिए । सोही सन्दर्भमा उनले आफूलाई बदनाम गराउन खोजेको बताएका छन् ।

“जानकी मन्दिर संग मलाई जोडि बदनाम गरिने प्रयास गरिएको छ । म आज पनि शेरको आँखामा रहेको हिराको आँखा कता गयो भने खोजी÷ अनुसन्धानको पक्षमा छु । दोषी जो कोहि होस कारवाही गर्नुपर्छ मेरो धारणा छ । अनाप सनाप लेखेर आफ्नो औकाद नदेखाउ ।”– उनले आफ्नो फेसबुकमा लेखेका छन् ।

केही जनाले व्यक्तिगत स्वार्थको लागि आफूलाई सो घटनाबारे नबोल्नको लागि केही रकम लिएको जस्तो अफवाह फैलाएको भन्दै यस्ता दुस्प्रचारप्रति ध्यान नदिन आग्रह गरेका छन् ।

उनले शेरको आँखाबाट हराएको करोडौंको हिरा, जानकीजीको करोडौंको जेबारात, गहनाहरुबारे आफू चुप नबस्ने चेतावनी समेत दिएका छन् । यादव जनता समाजवादी पार्टीका युवा नेता हुन् ।