जनकपुरः विद्युत प्राधिकरणका ४ कर्मचारी घुस सहित रँगेहात पक्राउ

न्यूज ब्यूरो, जनकपुरधाम । अख्तियार दुरुपयोग अनुसन्धान आयोगले विद्युत प्राधिकरणका चार जना कर्मचारीलाई घुस सहित रँगेहात पक्राउ गरेको छ ।

जनकपुरदेखि करिब १५ किलोमिटरको दुरीमा रहेको धनुषाको महेन्द्रनगरबाट विद्युत प्राधिकरणका चार जना कर्मचारी अख्तियारको फन्दामा परेको हो । महेन्द्रनगर स्थित रहेको नेपाल विद्युत प्राधिकरणको अन्तर्गतको ढल्केवर फ्यूज शाखामा कार्यरत ४ कर्मचारी पक्राउ परेका हुन् ।

अख्तियार दुरुपयोग अनुसन्धान आयोगको कार्यालय बर्दिबास महोत्तरीबाट खटिएको टोलीले शुक्रबार (आज) दिउँसो करिब ३ बजे धनुषाको मिथिला नगरपालिका वडा नम्बर ५ विश्रामपुरबाट उनीहरुलाई ५ हजार रुपैयाँ घुस रकम सहित पक्राउ गरेको जनाइएको छ ।

पक्राउ परेका कर्मचारीहरुमा जगत नारायण साह सुपरभाइजर, नवलकिशोर महतो, मनोहर कुमार महतो र एम. कुमार महतो रहेको अख्तियारले जनाएको छ ।

चारै जना कर्मचारीले विश्रामपुरस्थित एक कुखुरा फर्ममा विद्युत जडान गरिदिए वापत सेवाग्राहीसँग गैरकानूनी रुपमा ५ हजार रुपैयाँ घुस रकम लिएका थिए । सोही सूचनाका आधारमा उनीहरुलाई पक्राउ गरेको छ ।

कर्मचारीको साथबाट घुस रकम समेत बरामद भएकाले अख्तियारको बर्दिवास कार्यालयले जनाएको छ । भ्रष्टाचार निवारण ऐनअनुसार कारबाही हुने अख्तियार दुरुपयोग अनुसन्धान आयोगको कार्यालय बर्दिबास महोत्तरीले जनाएको छ ।

---

शिरिसन्यूजको सहयोगमा