परीक्षा दिएर बाहिर निस्केका विद्यार्थी मृत फेला, प्रहरी र स्थानीयबीच घम्साघम्सी

सबिन यादव, सिरहा । प्रदेश नं. २ को सिरहामा एक युवकको लास भेटाएको छ । मँगलबारदेखि हराएका सिरहा गोलबजार नगरपालिका वडा नं. १२ का एक विद्यार्थी मृत भेटाएका हुन् ।

सिरहाको गोलबजार नगरपालिका वडा नं. १२ बस्ने शिक्षक किशोर सिँहको अन्दाजी १८ बर्षिय छोरा आनन्द कुमार सिँह मृत अवस्थामा फेला परेका छन् । आनन्द बुधबार (आज) विहान करिब १०ः३० बजेको समयमा मृत अवस्थामा फेला परेको हो ।

गोलबजार नगरपालिका वडा नं. ६ चौबटिया स्थित मृत अवस्थामा देखेपछि स्थानीयहरुले प्रहरीलाई खवर गरेको थियो । खवर पाएलगत्तै घटनास्थल पुगेर प्रहरीले लासको मुचुल्का उठाएको सिरहा प्रहरीका प्रवक्ता शालिग्राम शर्माले जानकारी दिए ।

शर्माले स्थानीयलाई उदृत गर्दै गोलबजार नगरपालिका वडा नं. ६ स्थित रहेको सृजना सेकेन्डरी बोर्डिङग स्कूलमा कक्षा १० मा अध्ययनरत सिँह मँगलबार परीक्षा दिएर एक साथीसँग बाहिर निस्केको तर, अबेरसम्म नआएपछि खोजविन सुरु गरिएको थियो ।

हिजो अबेर रातीसम्म नभेटाएका आनन्दा आज विहानै मृत अवस्थामा फेला परेको हो । मृतक आनन्दका बुवा किशोर सिँह समेत आनन्द पढने स्कूलमा शिक्षक छन् । विगत कैयौं वर्षदेखि किशोर सिँह सोही विद्यालयमा अध्ययन अध्यापन गराउँदै आएका छन् ।

विद्यार्थी मृत अवस्थामा भेटाएपछि आक्रोसित स्थानीयहरुले प्रहरी प्रशासन विरुद्ध नारावाजी गरेको थियो । उनीहरुले जीउ ज्यानको सुरक्षको प्रत्याभूति गराउन नसकेको भन्दै केही बेर प्रहरीसँग घम्साघम्सी समेत गरेको थियो ।

लासको प्रकृतिको हेर्दा उनको हत्या गरिएको हुन सक्ने अनुमान गरिएको छ । यद्यपी यसको यथेष्ट जानकारी पोष्टमार्टमपछि मात्र आउने बताइएको छ ।

मृतको लासलाई पोष्टमार्टमको लागि जिल्ला अस्पताल सिरहा पठाईको जिल्ला प्रहरी कार्यालय सिरहाले जनाएको छ ।