प्रदेश २ः बलात्कार प्रयास घटनालाई मिलाउन पीडितलाई वडाध्यक्षद्धारा डेढ लाखको अफर

न्यूज ब्यूरो, बारा । जनप्रतिनिधिहरुको अस्वभाविक सक्रियातका कारण बारामा एक परिवारले न्याय पाउन सकेको छैन । बाराको सुवर्ण गाउँपालिकामा भएको जबरजस्ती करणी उद्योगको घटनालाई स्थानिय जनप्रतिनिधीले ढाकछोप गर्ने प्रयास गर्दा पिडित परिवारले न्याय पाउन नसकेको हो ।

सुवर्ण गाउँपालिका वडा नम्बर ५ औरहियाकी १२ वर्षीया एक बालिकालाई बलात्कारको प्रयास गरेका ३५ वर्षीय युवक शिवपूजन यादव विगत साढे चार महिनादेखि फरार छन् । गाउँका पञ्च र वडा अध्यक्षको सहयोगमा फरार भएका यादवलाई पक्राउ गर्न प्रहरीले सक्रियता नदेखाएको पिडित परिवारले दुखेसो पोखेका छन् ।

वडाध्यक्ष रामएकबाल साहले घटनालाई स्थानिय स्तरमै मिलाउन खोजेपछि न्याय सञ्चारमा ढिलाई भएको हो । वडाध्यक्ष साहले पिडित परिवारलाई डेढ लाख रुपैयाँ लिएर मामिला सामसुम पार्ने कोशिस समेत गरेको पिडित परिवारले बताएका छन् । पञ्च र वडा अध्यक्षको दवाव बावजुद पीडित बालिकाका पिताले न्याय माग्दै जिल्ला प्रहरी कार्यालय बारामा यादव विरुद्ध किटानी जाहेरी दर्ता गराएका थिए ।

घटनाको भएको भोलि पल्टै परिवारले प्रहरीमा जाहेरी दर्ता गराउन खोज्दा वडाध्यक्ष साहले अवरोध गरेका थिए । हामी प्रहरीमा जान्छौ भन्दा वडाध्यक्षले जान दिएनन् पिडितका बुबा भन्छन् वडाध्यक्षले प्रहरीमा जाहेरी दर्ताका लागि सिफारिस चाहिन्छ, भोली गर्दिन्छु भन्दै प्रहरीमा जान दिएनन्। घट्नाको तिन दिनसम्म गाउँका पञ्चहरूले घटना मिलाउन परिवारमाथि दबाव सिर्जना गर्न समेत प्रयास गरेका थिए ।

करणी गरेर फरार रहेका अभियुक्तलाई पक्राउ गर्न कुनै सक्रियता नदेखाएको पिडित परिवारले आरोप समेत लगाएका छन् । अहिले बालिकाकी बुबालाई सुरक्षित नागरिक आवास निर्माण योजना अन्तर्गत गरीब, विपन्नको लागि बनाइने घरको फाराम भर्न समेत बन्देज लगाइएको र घर निर्माणमा वडा अध्यक्षले नसघाएको पीडित बालिकाका पिताले बताएका छन् ।

गत भदौँ १ विश्वकर्मा पूजाका दिन यादवले राति साढे ७ बजे १२ वर्षीया बालिकालाई जबरजस्ती करणी गर्ने प्रयास गरेका थिए । विश्वकर्मा पूजाको अवसरमा गाउँमा आयोजित एक कार्यक्रममा जाँदै गर्दा यादवले बालिकालाई घरबाट सय मिटर पश्चिम एकजना छिमेकीको गोठमा बालिकालाई लगेर जबरजस्ती करणी गर्ने प्रयास गरेका थिए ।

यता जिल्ला प्रहरी कार्यालय बाराका प्रहरी उपरीक्षक कृष्ण पङ्गेनीले फरार आरोपितलाई पक्राउ गर्न प्रहरी परिचालन गरेको तर उनी नेपाल नफर्केकाले पक्राउ पर्न नसकेको बताउनु भयो । प्रहरीले उनलाई पक्राउ गरी बालिकालाई न्याय दिने आश्वासन दिएको छ ।