मधेश आन्दोलनका प्रथम सहिद रमेश महतोको परिवारलाई करारमा नोकरी

न्यूज ब्यूरो, जनकपुरधाम । २०६२/६३ का मधेश आन्दोलनको क्रममा सहादत प्राप्त गरेका सिरहाका सहिद रमेश महतोका परिवारलाई प्रदेश २ सरकारले नोकरी (जागिर) दिएको छ ।

प्रदेश २ सरकारको निर्णय अनुसार एक सहिद परिवार एक रोजगार कार्यक्रम अन्तर्गत प्रथम मधेस जन बिद्रोहका प्रथम वीर सहिद रमेश महतोका परिवारबाट एक जनालाई जागरि प्रदान गरिएको हो ।

मुख्यमन्त्री तथा मन्त्री परिषद्को कार्यालयमा कम्पयुटर अपरेटर पदको सहायकस्तर पाँचौ तहमा कार्य गर्न अनिता कुमारी महतोलाई शुक्रबार मुख्यमन्त्री लालबाबु राउतले नियुक्ति पत्र प्रदान गरेका छन् ।

प्रदेश नम्बर २ का महान्याधिवक्ता दीपेन्द्र झा सहितको उपस्थितिमा महतोलाई ७ महिनाको लागि करार सेवामा जागिर दिएको उल्लेख गरिएको छ । उनलाई पुस ९ गतेदेखि नै लागू हुने गरी आउँदो बर्षको असाढ मसान्तसम्मको लागि जागिर दिएको नियुक्ति पत्रमा उल्लेख गरिएको छ ।

२०६२/६३ को मधेश आन्दोलनको क्रममा लहानस्थित रमेश महतोलाई गोली दागी हत्या गरिएको थियो ।