सिरहाः बिना सूचनाकै मलखाद्य वितरण, नातागोतालाई नियम तोडेर बोरैबोरा मल

न्यूज ब्यूरो, सिरहा । सिरहाको एक गाउँपालिकाले बिना सूचनाकै मल खाद्य वितरण गरेपछि स्थानीय किसानहरु आक्रोसित भएका छन् ।

सिरहाको नरहा गाउँपालिकाले शुक्रबार कसैलाई जानकारी नगराउँदै बिना सूचनाकै आधारमा मल खाद्य वितरण गरेपछि किसानहरु आक्रोसित भएका छन् । उनीहरुले आफ्ना आफन्तलाई हाकिमहरुले त्यतिकै उपलब्ध गराएको आरोप लगाए ।

नरहा गाउँपालिकाका कृषि प्रमुख रामप्रकाश यादवले मलखाद्य वितरण सम्बन्धी कुनै जानकारी नै नगराई काँखापाखाको हिसाबले वितरण गरेको आरोप लगाइएको छ । कसैलाई १ बोरामात्र उपलब्ध गराएका छन् भने कसैलाई २० देखि २५ किलोसम्म पनि मात्र उपलब्ध गराएको छ ।

गाउँपालिकाले तोकेको डिलर वा गाउँपालिका आफैंले वितरण गर्नुपरेमा सूचना जारी गरी वितरण गर्नुपर्नेमा त्यस्तो केही नगरी आफुखुसी वितरण गरेको आरोप लगाइएको छ । सो क्रममा युरिया प्रतिबोरा ९०० रुपैयाँ र डिएपी प्रतिबोरा २३५० रुपैयाँको दरले वितरण गरेको हो ।

महिनो देखि मलखाद्य नपाएकोले किसान मारमा परेको बेला पनि गाउँपालिकाले सूचना नै जारी नगरी वितरण गर्दा असल किसानहरु अझै मार्कामा परेका छन् । बिना सूचना वितरण गर्न नपाउने प्रावधान रहेको जनाउँदै यस्तो नहुनुपर्नेमा गाउँपालिका उपाध्यक्ष गुलाबदेवी चौधरीले जनाइन् ।

न्यूज ब्यूरोका सहकर्मी वितरण स्थलमा पुग्दा गाउँपालिकाले वितरण गरिरहेको मलखाद्य वितरण तत्काल स्थगित गरेको थियो । यता, वडा नं. ५ का वडाध्यक्ष हुकुमदेवले आफूलाई केही थाहा नभएको प्रतिक्रिया दिए ।