भारतसँगको सील गरिएको बोर्डर खोल्नुपर्छ : जसपा

न्यूज ब्यूरो, जनकपुरधाम । जनता समाजवादी पार्टी नेपाल (जसपा) ले भारतसँगको नाका खोल्नुपर्ने माग गरेका छन् ।

जनता समाजवादी पार्टीका बरिष्ठ नेता महन्थ ठाकुर र उपेन्द्र यादवद्धारा जारी गरिएको विज्ञप्तिमा नेपाल सरकारले तत्कालै भारतसँगको नाका (सीमा) खोल्नुपर्ने माग गरेको हो ।

लामो समयदेखि भारतसँगको सीमा बन्द रहेको कारण मुलुकको अर्थतन्त्रमा गहिरो असर परेको भन्दै जसपाले सीमा खोल्न नेपाल सरकारसँग माग गरेको हो । जसपाले निरन्तर सीमा सीलका कारण तराई मधेशको जनजीवन प्रभावित भएको उल्लेख गरेको छ ।

सरकारले कोरोना भाइरस फैलिन नदिन बिना तयारीको सीमा सील गरिएको जनाउँदै सीमा खोलेर पूर्ण व्यवस्थित गर्न पनि माग गरेको छ । जसपाले सीमामा सुरक्षा व्यवस्था मिलाएर सीमा नाका खोल्न आग्रह गरेको हो ।

सीमा सीलका कारण कृषि, शिक्षा, स्वास्थ्य, उपचार समेतमा असर परेको भन्दै नेताद्धयले विज्ञप्ति जारी गर्दै सीमा खुलाउन सरकारसँग माग गरेको छ । जसपाले स्वास्थयकर्मीको भत्ता, तलब, अस्पताल, उपचार, चिकित्सकको पूर्ण व्यवस्थान गरी सीमा खुल्ला गर्न माग गरेको हो ।