सिरहाबाट नक्कली नोट (रुपैयाँ) छाप्ने मेसिन सहित ३ जना पक्राउ

न्यूज ब्यूरो, सिरहा । प्रदेश नम्बर २ को सिरहा जिल्लाबाट प्रहरीले नक्कली नोट छाप्ने मेसिन सहित ३ जना युवकलाई पक्राउ गरेको छ ।

सिरहा जिल्लाको मुख्य बजार मानिने गोलबजारबाट सशस्त्र प्रहरी बेश क्याम्प गोलबजारका प्रहरी ईन्स्पेक्टर रोशन थापाले नक्कली नोट सहित नोट छाप्ने मेसिन सहित ३ जनालाई पक्राउ गरेको हो ।

विहिबार दिउँसो करिब २ बजेको समयमा गोलबजार नगरपालिका वडा नम्बर ६ स्थित बस्ने घरधनी बीरेन्द्र महतोको घरमा दैनिकी रुपमा केही युवकहरु शंकास्पद गतविधि गरिरहेको गोप्य सूचनाको आधारमा उनीहरुलाई पक्राउ गरिएको हो ।

“गोप्य सूचना पाएलगत्तै हामीले सर्च गर्न सो स्थानमा जाँदा खान तलासी गरयौै, खान तलासीको क्रममा उनीहरुले ६ लाख ८४ हजार नक्कली नोट सहित प्रिन्टर समेत नियन्त्रणमा लियौं”– ईन्सपेक्टर थापाले भने ।

नक्कली नोट र नोट छाप्ने मेसिन सहित गोलबजार नगरपालिका वडा नम्बर १२ बस्ने अन्दाजी बर्ष २५ का धीरज यादव, कल्याणपुर नगरपालिका वडा नम्बर ७ बस्ने बर्ष २४ को बिमलेन्द्र कुमार नायक र गोलबजार नपा १२ बस्ने बर्ष २० को सँजय रायलाई पक्राउ गरेको हो ।

६ लाख ८४ हजार नक्कली रुपैयाँ सहित एनएस पल्सर मोटरसाईकल समेत नियन्त्रणमा लिएको हो । स १० प ५०३४ नम्बरको मोटरसाईकल नियन्त्रणमा लिएको ईन्स्पेक्टर थापाले जानकारी दिए ।

न्यूज ब्यूरोसँग कुराकानी गर्दै ईन्सपेक्टर थापाले सो घरमा उनीहरुले लागुऔषध सेवन सहित ओसारपोसार गरिरहेको सूचनाको आधारमा छापामारी गर्दा नक्कली नोट र छाप्ने मेसिन सहित पक्राउ गर्न सफल भएको बताए ।

उनीहरुलाई पक्राउ गरी प्रक्रियागत नेपाल प्रहरीलाई बुझाएको उनले थपे । उनीहरुको साथबाट एचपी कम्पनीको एक ल्यापटप र एक प्रिन्टर समेत बरामद गरेको हो ।