महेन्द्र रामको लास २५ दिनदेखि अस्पतालमै

न्यूज ब्यूरो, सर्लाही । नेपाली काँग्रेस सर्लाहीले फेरी आन्दोलनको तयारी गर्ने भएको छ । गत असोज २२ गते सर्लाहीको रामनगर गाउँपालिका वडा नम्बर ७ सिसौट बस्ने महेन्द्र रामको मृत्यु भएको थियो । रामको शव २४ दिन बितिसक्दापनि वीरगञ्जस्थित नारायणी अस्पतालमा नै अलपत्र अवस्थामा छ ।

काँग्रेसले मृतक रामलाई सहिद घोषणा गर्नुपर्ने, हत्यामा संलग्न रहेका व्यक्तिहरुलाई पक्राउ गर्नुपर्ने र पीडित परिवारलाई क्षतिपुर्ती उपलब्ध गराउनु पर्ने माग गर्दै आएको छ । आफ्नै घर अगाडी बसिरहेको बेला राममाथि संघातिक आक्रमण गरिएको थियो ।

गंभीर घाइते भएका रामलाई उपचारका लागि वीरगञ्ज स्थित नारायणी अस्पतालमा लगिएको थियो ।त्यहाँ उनको २२ गते मृत्यु भएको थियो ।मृतकका परिवारले शवलाई मलंगवा जिल्ला अस्पतालमा पोष्टमार्टम गराउनु पर्ने माग गर्दै आएकोछ । नेपाली काँग्रेस समर्थित रामको हत्यामा सत्तारुढ नेपाल कम्युनिष्ट पार्टी (नेकपा) का स्थानीय नेताहरुको संलग्नता रहेको आरोप लागेकोछ ।

हत्यामा संलग्नहरुलाई प्रहरीले जोगाउन खोजेको आरोप लगाउँदै काँग्रेसले मलंगवामा गत असोज २८ गते बृहत्त बिरोध प्रदर्शन गरेका थिए । काँग्रेसको बिरोध प्रदर्शनको क्रममा प्रहरीसित भएको झडपमा १ पत्रकार केहि स्थानिय र सुरक्षाकर्मी गरी ४७ जना घाइते भएका थिए ।त्यस लगतै दसैं परेकाले बिरोधको कार्यक्रम स्थगन गरिएको थियो ।

‘दीपावली अगावै सशक्त प्रदर्शन गर्ने तयारी भइरहेकोछ’ काँग्रेसका संघीय सांसद अमरेश कुमार सिंहले भने, पर्वत्यौहारको कारण स्थगन भएको बिरोध कार्यक्रम अझ सशक्त रुपमा गर्नेछौ ।काँग्रेसको शान्तिपूर्ण प्रदर्शनमाथि प्रहरीले गरेको ज्यादतीको बिरुद्धपनि अब आन्दोलन हुने उनले बताए । प्रहरीले घटनामा संलग्न ३ जनालाई पक्राउ गरिएको र अन्यको खोजी भइरहेको जिल्ला प्रहरी कार्यालयका प्रहरी प्रवक्ता मदन कुवँरले बताए ।

तर काँग्रेसले घटनामा संलग्न वास्तविक दोषीहरुलाई जोगाउन प्रहरीले अन्य व्यक्तिहरुलाई समातेको आरोप लगाएका छन् । ‘सर्लाहीका एसपी ओली सरकारको पार्टी कार्यकर्ता जस्तो कार्य गरिरहेका प्रदेश नं. २ का प्रदेश सभा सदस्य बिरेन्द्र सिंहले बताए । हत्या जस्तो जघन्य अपराधमा संलग्न व्यक्तिलाई उन्मुक्ति दिने काम प्रहरीले गर्न पाउँदैन् ।

शान्तिपूर्ण प्रदर्शनमाथि लाठी बर्साउने एसपीमाथिपनि कार्वाही हुनुपर्ने माग रहेको उनले बताए । रामको शव अस्पतालमा नै रहेकाले काजक्रियापनि भएको छैन् ।मृतक महेन्द्र रामको टोलमा दसैंमा समेत खुशियाली आउन सकेन् ।रामको घर परिवार शोकमा डुबेका छन् ।

शवको अन्त्येष्टि नभएको कारण काजक्रियापनि हुन सकेको छैन् । काँग्रेसले तिहार अगावै एक पटक बिरोध प्रदर्शन गर्ने र छठपछि बिरोध कार्यक्रमलाई निरन्तरता दिने तयारीमा जुटेकोछ ।दीपावली र छठको कारण बिरोध कार्यक्रम अगाडी बढन नसकेको काँग्रेस प्रदेश सांसद सिंहको भनाई छ ।