शिक्षकको कुटाईले विद्यार्थी गम्भिर, अवस्था तनावग्रस्त !

न्यूज ब्युरो ||
धनुषा, २५ माघ । धनुषामा एक समुदायिक विद्यालयका शिक्षकले विद्यार्थीलाई कुटेर गम्भिर बनाएपछि धनुषाधामको अवस्था तनावग्रस्त भएको छ ।

धनुषाको धनुषाधाम नगरपालिकामा स्थापित धनुष जनता उच्च मावि विद्यालयका एक शिक्षकले एक विद्यार्थीलाई कुटेर गम्भिर बनाएको हो ।

विहिबार अपरान्ह करिब ४ः३० बजेको समयमा विद्यालयका शिक्षक शुशिल भुजेलले विद्यालयका कक्षा ११ मा अध्ययनरत जलेश्वर नगरपालिका वडा ३ बस्ने रामजिवन मिश्रको छोरा बर्ष १८ सुमन मिश्रलाई कुटपिटगरी गम्भिर घाइते बनाएपछि धनुषाधामको अवस्था तनावग्रस्त भएको हो ।

प्रत्यक्षदर्शीका अनुसार, शिक्षक भुजेलले मदिरा सेवन गरी विद्यार्थी मिश्रलाई कुटपिट गरी घाइते बनाएको हो ।
विद्यालयमा नियमित पठनपाठन भइनरहेको भन्दै केही दिनअघि विद्यार्थीहरुले विद्यालयमा तालाबन्दी गरेको थियो । ताला खुलाउन शिक्षक भुजेलले एक सहायक लगेर फुटाउन खोजेपछि विद्यार्थीहरुले रोकेका थिए ।

मदिरा सेवन गरी मातेका भुजेलले विद्यार्थी मिश्रलाई मरिमसान्त गरी कुटपिट गरेपछि विद्यार्थी गम्भिर भएको बताइएको छ ।
घाइते मिश्रलाई स्थानीय क्लीनिकमा उपचार भइरहेको छ भने धनुषाधामको अवस्था तनावग्रस्त भएको छ ।

विद्यार्थीलाई कुटेको भन्दै विद्यार्थी तथा स्थानीयवासीहरुले धनुषाधाममा चक्काजाम सहित विद्यालयमा तोडफोड सुरु गरेका छन् ।

घटनाको पुष्टि ईलाका प्रहरी कार्यालय धनुषाले समेत गरेको छ भने कसले कुटेको हो भन्ने बारे पुष्टि भइनसकेको प्रतिक्रिया दिए ।
यस घटनाबारे थप जानकारी आउन बाँकी छ ।