एकै गाउँका महतो र खातुन झुण्डिएको भेटिए

न्यूज ब्यूरो, महोत्तरी । महोत्तरीको एउटै गाउँका दुई जना झुण्डिएको भेटिएको छ । सो क्रममा एक किशोर र एक युवति झुण्डिएको अवस्थामा भेटिएको हो ।

महोत्तरी जिल्लाको मनरासिस्वा नगरपालिका–६ सरपल्लो गाउँमा एकै दिन दुवै जनाको लास भेटाएको हो । जिल्ला प्रहरी कार्यालय महोत्तरीका प्रहरी नायब उपरीक्षक प्रकाश विष्टका अनुसार मङ्गलबार एकै दिन स्थानीय १६ वर्षीय सुनिल महतो र २० वर्षीया खुश्बु खातुनको शव झुण्डिएको अवस्थामा फेला परेको हो ।

सुनिलको शव आफ्नै घरमा झुण्डिएको अवस्थामा फेला परेको हो भने खुश्बुको शव उनको घरदेखि पाँच मिटर उत्तरमा रहेको आँपको बगैँचामा झुण्डिएको अवस्थामा फेला परेको जनाइएको छ ।

उनीहरु दुवै के–कति कारणले झुण्डिएको अथवा उनीहरुको मृत्यु कसरी भएको भन्ने प्रहरीले अनुसन्धान गरिरहेको छ भने दुवै जनाको शव परीक्षणका लागि जिल्ला अस्पताल जलेश्वर पठाइएको छ ।