सशस्त्र प्रहरीमा १८३३ सिटमा भर्ती खुल्यो , मधेशी कोटामै २३१ सिट

न्यूज ब्यूरो, जनकपुरधाम । नेपालभरिमा विभिन्न ठाउँमा रिक्त रहेको पदको लागि सशस्त्र प्रहरीको लागि १८ सय ३३ जनाको लागि विज्ञापन गरी भर्ना खुल्ला गरेको छ ।

सशस्त्र प्रहरीले एक शनिबार एक सूचना विज्ञापन प्रकाशित गर्दै नेपालभरिमा रिक्त रहेको १८३३ जना पदपूर्ति गर्न आवेदन माग गरेको हो । जसमा मधेशी कोटामै २ सय ३१ जना आरक्षण तर्फ माग गरिएको छ ।

सुचना नम्बर ०१ (२०७७/०७८) मा प्रकाशित गरिएको सो पदपूर्तिको लागि आवेदन दिन आग्रह गर्दै आवेदनको लागि स्व्यमं आफै उपस्थित भई नजिक वा पायक पर्ने शसस्त्र प्रहरीको कार्यालयमा सम्पर्क गर्न भनिएको छ ।

फाराम भर्न आगामी कार्तिक २३ गतेसम्म अन्तिम मिति रहेको छ भने आवेदन दिँदा आवेदनमा १० रुपैयाँको हुलाक टिकट समेत टाँस्नुपर्ने हुन्छ । नेपालभरिको विभिन्न ठाउँमा खाली रहेको सो पदपूर्तिको लागि शसस्त्र प्रहरी जवानको लागि नयाँ भर्ना खुल्ला गरिएको हो ।

जसमा ९८८ जना खुल्ला तर्फ माग गरिएको छ भने आरक्षण तर्फमा मधेशी कोटोमा २ सय ३१ सिट, अमर असशक्त, स.प्र.क. सन्ततिको लागि २० सिट, महिला १ सय ६५, आदिवासी जनजाती तर्फ २ सय ६४ सिट, दलितमा १ सय २४ तथा पिछडा र क्षेत्रिय तर्फ ४१ सिट समावेशी तर्फ छुटयाइएको छ ।

नियुक्ती हुनको लागि आवश्यक योग्तामा सशस्त्र प्रहरी जवानको लागि विज्ञापन प्रकाशित भएको दिनदेखि १८ वर्ष पुरा भई २२ बर्ष ननाघेको हुनुपर्ने प्रावधान कायम गरिएको छ ।

जवानको लागि चाहिने आवश्यक योग्यतामा कम्तीमा ८ कक्षा उतीर्ण गरेको, पुरुषको लागि कम्तीमा ५ फिट २ ईन्च र महिलाको लागि कम्तीमा पाँच फिट उचाई हुनुपर्ने तोकिएको छ ।

पुरुषको हकमा छाती नफुलाउँदा कम्तीमा ३० ईन्च र फुलाउँदा ३२ ईन्च भएको हुनुपर्ने योग्यता तोकेको छ भने महिलाको हकमा भने यो लागू हुने छैन् । महिलाको लागि यो योग्यता आवश्यकता पर्ने छैन ।

आँखाको सन्दर्भमा माईनस २ वा प्लस २ भन्दा बढी कमजोर नभएको, पुरुषको लागि कम्तीमा ५० किलो र महिलाको लागि कम्तीमा पनि ४२ किलो तौल (वजन) हुनुपर्ने छ । आवेदकसँग अनिवार्य रुपमा नेपाली नागरिकता हुनुपर्ने माग गरिएको छ ।

सोही क्रममा नैतिक पतन देखिने फौजदारी अभियोगमा अदालतबाट सजाय नपाएको, कुनै राजनीतिक दल (पार्टी) को सदस्य नरहेको, आतँककारी सँगठनको सदस्य नरहेको, भविष्यमा सरकारी सेवाको निमित्त अयोग्य ठहरिने गरी नोकरीबाट बर्खास्त नभएको, मानव अधिकार र मानवीय कानुनको उलँघनमा सजाय नपाएको जस्ता प्रावधानहरु लागू हुनेछ ।

यसका साथै, प्रहरी प्रधान कार्यालयले तोकेको शिक्षण सँस्था र आफ्नो नातेदार बाहेकका अन्य दुई जना नेपाल सरकारको बहालबाला राजपत्राङिकत अधिकृतबाट राम्रो चरित्र (क्यारेक्टर सर्टिफिकेट) को सिफारिस र निरोगिताको प्रमाणपत्र पाएको हुनुपर्ने भनिएको छ ।

नेपाल विरुद्ध जासुसी गरेको अभियोगमा सजाय नपाएको हुनुपर्ने भनेर सूचनामा उल्लेख गरिएको छ ।

दस्तुरको सम्बन्धमा दरखास्त (फाराम) बुँझाउँदा १५० रुपैयाँ बुझाउनुपर्ने जनाइएको छ । साथै समावेशी तर्फ समेतको दरखास्त फाराम बुझाउँदा थप समूहको लािग प्रति समूह परीक्षा दस्तुको २० प्रतिशत (रु. ३०) रकम थप दस्तुर बुझाउनुपर्नेछ ।

फाराम भर्दा नेपाली नागरिकताको प्रमाणपत्रको प्रतिलिपि, हालसालै खिचिएको दुवै कान देखिएको पासपोर्ट साईजको ५ प्रति फोटो, शैक्षिक योग्यताको प्रमाणपत्रको प्रतिलिपि अनिवार्य गरिएको छ ।

आदिवासी जनजातीको लागि प्रमाणित भएको प्रमाणपत्रको प्रतिलिपि, मधेशी कोटाको लागि मधेशी प्रमाणित प्रमाणपत्र, दलितका लागि राष्ट्रिय दलित आयोगबाट दलित भनि प्रमाणित गरिएको प्रमाणको प्रतिलिपि माग गरिएको छ ।

यस्तै, पिछडिएका क्षेत्रमा अछाम, कालिकोट, जाजरकोट, जुम्ला, डोल्पा, बझाँग, बाजुरा, मुगु र हुम्ला जिल्लाका स्थायी बसोबास गरी सम्बन्धित जिल्लाबाटै नागरिकता लिएको हुनुपर्ने प्रमाण सहित फाराम भर्न भनिएको छ । त्यसको लागि सम्बन्धित गाउँपालिका वा नगरपालिकाबाट दरखास्त दिँदाका बखतसम्म सोही स्थानमा स्थायी बसोबास भएको भन्ने सिफारिस समेत माग गरिएको छ ।

फाराम भर्नेहरुको लागि परिक्षाको सन्दर्भमा भने प्रारम्भिक शारीरिक परिक्षण, शारीरिक सहिष्णुता परीक्षा, विस्तृत स्वास्थ्य परीक्षण, लिखित परीक्षा, विशेष स्वास्थ्य परीक्षण र अन्तरवार्ता समेत गरी लिइने जनाइएको छ ।

परीक्षा सबै सकेपछि त्यसको रिजल्ट (नतिजा) हेर्नको लागि एसएमएस प्रक्रिया वा शसस्त्र प्रहरीको वेभसाईटबाट हेर्न मिल्ने व्यवस्था मिलाइएको छ । एसएमएसबाट आरसिटी लेखेर स्पेस दिँदै दर्ता नम्बर टाईप गरी १११४ मा पठाउँदा जानकारी आउने व्यवस्था गरिएको हो । RCT registration No. (ex. RCT 12458) send it to 1114