शहिद सूर्यनाथ रानको सपना पूरा हुने नजिक छ : नेता बरबरिया

न्यूज ब्यूरो, जनकपुरधाम । नेपाल कम्यूनिष्ट पार्टी (नेकपा) का केन्द्रीय सदस्य एवम् धनुषा जिल्ला ईन्चार्ज श्रवण कुमार बरबरिया (यादव) ले शहिद सूर्यनाथ रानको सपना पूरा हुन केही कदम बाँकी रहेको जिकिर गरेका छन् ।

धनुषाको शहिदनगर नगरपालिकाको राष्ट्रिय गौरवको आयोजना अन्तर्गत वडा नं. ५ पचहर्वामा "शहिद सूर्यनाथ रान प्रादेशिक स्टेडियम" को शिलान्यास गर्दै नेता बरबरियाले शहिद रानको समृद्धिको सपना पुरा हुन केही कदम मात्र बाँकी रहेको बताए ।

शहिदनगर नगरपालिका वडा नं. ५ पचहर्वा स्थित शिलान्यास गरिएको प्रादेशिक स्टेडियम राष्ट्रिय गौरवको योजनाको रुपमा रहेको बताउँदै नेता बरबरियाले शहिदनगर नगरपालिकाका मेर उदय कुमार बरबरिया (यादव) ले शहिदनगरको समृद्धिको लागि चालेको कदम जनहितमा हुने बताए ।

प्रदेश नं. २ मै प्रदेश स्तरको स्टेडियमको अवधारणा र प्रथम शिलान्यास शहिदनगर नगरपालिकाले नै गरेको भन्दै उनले नगर प्रमुखलाई बधाई तथा शुभकामना समेत दिए । उनले धनुषाको पूर्वी भेकमा किसान र सर्वहारा नेता मानिएको शहिद सूर्यनाथ रानको सपना अन्तर्गत प्रादेशिक स्टेडियमको शिलान्यास गर्न पाउँदा खुसी व्यक्त गरे ।

यसका साथै, शहिद कामेश्वर कुशेश्वरको स्मृतिमा आधुनिक बस पार्क समेत निर्माणको लागि योजना पास भएको बताउँदै आधुनिक बस पार्क र स्टेडियम निर्माण भएपछि यहाँका आम नागरिक व्यापारिक दृष्टिकोणले समेत लाभान्वित हुने बताए । उनले स्टेडियम र आधुनिक बस पार्क समेत शहिदनगर, शहिदगरवासीको पहिचानको रुपमा स्थापित हुने बताए ।

शहिदनगर नगरपालिकाका मेयर उदय बरबरियाको परिकल्पना अन्तर्गत राखिएको राष्ट्रिय गौरवको योजना "शहिद सूर्यनाथ रान प्रादेशिक स्टेडियम" शिघ्र नै निर्माण सम्पन्न हुने उनले बताए ।