आयल निगमको महेन्द्रनगर डिपोका हाकिमले अनियमितता गरेको आरोप

न्यूज ब्यूरो, जनकपुरधाम । नेपाल आयल निगम महेन्द्रनगर धनुषाको प्रमुख (हाकिम) मनोज साहले डिपोभित्र अनियमितता गरेको आरोप लगाइएको छ ।

महेन्द्रनगर डिपोमा कार्यरत स्थायी कर्मचारीलाई छेउ लगाएर करारका कर्मचारीबाट काम गराएको आरोप सहित कर्मचारीको ओभर टाइमको नाममा रकम उठाएको आरोप लगाइएको छ ।

“महेन्द्रनगर डिपोमा दुई वटा सवारी चालक राखिएको छ । एउटा दैनिक ज्यालामा छन् भने अर्का करारमा राखिएको छ । स्थायी कर्मचारीलाई बायपास गरी चालकबाट डीप गराइरहेको छ ।”– नाम नखोल्ने शर्तमा एक कर्मचारीले भने ।

डिपोमा पेट्रोलियम डीपको लागि स्थायी टेक्नीसियनमा उदय यादव रहेपनि उनलाई छेउ लगाएर करारमा नियुक्त गरिएको सवारी चालकबाट डीप गराइरहेको बताइएको छ । चालकलाई डीप सम्बन्धी ज्ञान नभएपनि तेलमा अनियमितता गर्नको लागि त्यस्तो गरिएको हुन सक्ने आरोप लगाए ।

“स्थायी कर्मचारी हुँदाहुँदै पनि करारका कर्मचारी नियुक्त गरी चालकबाट डीप गराइरहेको छ । जबकी स्थायी कर्मचारी डीपको लागि त्यतिकै दिनभरि बसेको छ । आफ्ना मान्छेलाई करारमा नियुक्त गरी प्रमुख मनोज साहले तेलमा अनियमितता गरिरहेको छ ।”– उनले थपे ।

यसका साथै, कर्मचारीहरुले डिपोमा ओभरटाइम गरेको वापतको सबै रकम प्रमुख साहले आफै झिकेर राखेको पनि आरोप लगाएको छ । कार्यालयमा जडान गरिएको हाजिरी मेसिनमा विहान १० बजेदेखिको हाजिरी तथ्याँक छ भने रजिष्टरमा विहान ७ बजेदेखिकै कार्य देखाएर कर्मचारीको नामको ओभरटाईम वापतको रकम झवाम्म पारेको आरोप लगाइएको छ ।

डिपो प्रमुख साह उपर डिपोमा आउने पेट्रोलियमको नमुना सँकलनको लागि प्रत्येक टयाँकरबाट २ लिटर तेल स्याम्पलको लागि राख्ने तेल पनि जेनेरेटरमा प्रयोग गरी माथिबाट जेनेरेटरको लागि आउने तेलको रकममा पनि अनियमितता गरेको आरोप लगाइएको छ ।

यता, महेन्द्रनगर डिपो प्रमुख मनोज साहले भने यी आरोपहरुलाई निराधार बताएका छन् । न्यूज ब्यूरोसँगको कुराकानीको क्रममा प्रमुख साहले आरोपलाई खण्डन गर्दै आरोप लगाउने स्थायी कर्मचारी आफैैं ईमान्दार नभएको र कार्य सँचालन सहज रुपमा नगरेको भन्दै बाध्यताले करारमा कर्मचारी राखेर काम गराएको बताए ।

उनले करारका कर्मचारी स्थायी कर्मचारीभन्दा राम्रो कार्य गरेको दाबी गर्दै सबै कार्य कार्यविधि र निर्देशिका बमोजिम नै गरिरहेको दाबी गरे ।

हाजिरी र ओभरटाईमको प्रसँगमा उनले आफू अहिले काम विशेषले जिल्ला बाहिर रहेको बताउँदै आएपछि सबै प्रमाण उपलब्ध गराउने प्रतिवद्धता जनाए ।

यसका साथै, छेउ लगाइएका भनिएका स्थायी कर्मचारीमध्येका टेक्नीसियन उदय यादवले आफूसँग त्यस्तो केही नभएको र आफूलाई केही थाहा नभएको भन्दै यसबारे प्रतिक्रिया दिन मानेनन् ।

सोही कार्यालयका कर्मचारी सरोज यादवले भने आफूहरु स्थायी कर्मचारी हुँदाहुँदै पनि फिल्डमा सवारी चालकलाई काम गराएको बताए । उनले आफू प्रशासन सहित फिल्डको डयूटि हुनुपर्नेमा आफूलाई छेउ लगाउँदै करारमा र दैनिक ज्यालादारीमा राखिएको चालकसँग फिल्डको काम गराएको आरोप लगाए ।