सिरहाका लजबाला भन्छन्–'अहिले लोकल केटीहरु मात्रै आउँछन्'

न्यूज ब्यूरो, सिरहा । सिरहाको गोल बजारमा स्थानीय प्रहरीको मिलोमत्तोमा यौन व्यावसाय फस्टाउँदै गएको छ । सिरहाको गोलबजार ईलाका प्रहरीको मिलोमत्तोमा होटल तथा लजहरुमा यौन व्यवसाय फस्टाएको छ ।

यौन व्यावसाय चलाउने होटल तथा लज व्यावसायीहरुले स्थानीय प्रहरीलाई मासिक रुपमा रकम दिने गरेको यसअघि नै खुलिसकेको छ भने सोही ठाउँमा सँचालनमा रहेको मनोज होटल एण्ड लजमा अहिले पनि बजारको महिलाहरु आउने गरेको बताएका छन् ।

घुमाउरो गरी होटल सँचालक राजु साहलाई यौन व्यवसाय बारे सोध्दा उनले भने,–“अहिले लकडाउनमा कहाँ व्यापार चलेको छ धेरै ?, अहिले लोकल केटीहरु मात्रै आउने गरेको छ । लकडाउन नभएको बेलामा बाहिरबाट पनि आउथ्यो, अहिले बजारकै केटीहरु ४/५ जना साँझ आउँछिन् । व्यापार डाउन छ अहिले ।”

सिरहा : प्रहरी ईन्स्पेक्टर 'पुरी' को संरक्षणमा यौनधन्दा, मासिक कमिशन कति ?

सिरहाको गोलबजार नगरपालिका वडा नं. ४ गोलबजार बजारमै रहेको मनोज होटल एण्ड लज सहित त्यहाँ सँचालित अन्य कैयौं लज तथा होटलमा यौन व्यावसाय खुल्लेआम हुने गरेको छ । स्थानीय प्रहरीले त्यहाँ यौन व्यावसायीलाई संरक्षण दिने गरेको छ ।

कोरोना भाइरसको सँत्रास र महामारीमा पनि गोलबजारमा विभिन्न होटलहरुमा यौन व्यावसाय फस्टाएको छ । दिउँसो हुने वित्तिकै बजारको विभिन्न ठाउँबाट स्थानीय युवतिहरु, महिलाहरु होटल आउने गरेको छ ।

यद्यपी, जिल्ला प्रहरी कार्यालय सिरहा र जिल्ला प्रशासन कार्यालय सिरहाले यौन व्यावसायलाई निरुत्साहित गर्नको लागि अझै कुनै पहलकदमी देखाएको छैनन् ।