सिरहाको औरही गाउँपालिकामा अख्तियारको छापा

न्यूज ब्यूरो, सिरहा । सिरहा जिल्लाको औरही गाउँपालिकामा अख्तियारको टोलीले छापा हानेको छ । गाउँपालिका अध्यक्षले अस्वभाविक रुपमा रकम निकासा गरेको आशंकामा कागपत्रहरु नियन्त्रणमा लिएको हो ।

गाउँपालिका अध्यक्ष सिद्धार्थ यादवले पदाधिकारी भत्ता भनेर १२ लाख रुपैयाँ भत्ता वापत लिएपछि व्यापक जनगुनासो बढेपछि अख्तियार छापा हानेको हो । कार्यपालिका बैठक बाहेक जनताको सेवा गरेवापत जनप्रतिनिधिले कुनै प्रकारको भत्ता लिन नपाउने व्यवस्था रहेपनि अध्यक्षले १२ लाख रुपैयाँ भत्ता पकाएका छन् ।

अख्तियार दुरुपयोग अनुसन्धान आयोग बर्दिवासबाट खटि गएको टोलीले गाउँपालिकाको केही कागजातहरु आफ्नो नियन्त्रणमा लिएको छ । कोरोना भाइरसको संक्रमण रोकथाम तथा नियन्त्रणको नाममा पनि भ्रष्टाचार गरेको व्यापक जनगुनासो बढेपछि अख्तियारले छापा हानेको हो ।

आईतबार (आज) गाउँपालिकाले कोरोना भाइरसको नियन्त्रण तथा रोकथामको लागि २ करोड २० लाख ८० हजार ९ सय २९ रुपैयाँ खर्च गरेको तथ्याँक सार्वजनिक गरेपछि के र कुन शिर्षकमा खर्च भएको बारे छापा हानिएको हो ।

अख्तियारका शाखा अधिकृत हिरालाल भोलम र प्रहरी ईन्स्पेक्टर सजेन्द्र भट्टको नेतृत्वमा गएको टोलीले कार्यालयको कागजपत्र नियन्त्रणमा लिएको हो । यसअघि सिरहा नगरपालिकामा समेत अख्तियारले छापा हानेर कागजपत्र नियन्त्रणमा लिएको थियो ।