सशस्त्र प्रहरीका यी घुमुवाले गर्छन् तस्करको गाडी स्कोटिङ्ग

न्यूज ब्यूरो, जनकपुरधाम । धनुषा जिल्लाको पूर्व दक्षिणी क्षेत्रमा हुने तस्करीमा एक सशस्त्र प्रहरीको पनि सँलग्नता रहेको पाइएको छ ।

सशस्त्र प्रहरीका जवान प्रमोद पँजियारले तस्करहरुको गाडी आफैं स्कटिँग गरी तस्करीका मालसमानहरु भित्रयाउने गरेको खुलेको छ । शसस्त्र प्रहरी बल सोनीगमा बेस क्याम्पका घुमुवा प्रहरी पँजियारले आफ्नो धर्म र उद्देश्य विपरित अवैध काम गराईरहेका छन् तर सम्बन्धित निकाय भने मौन बसिरहेको एक स्थानियले भने ।

तस्करहरु भारतबाट कपडालत्ता, ईलेक्ट्रिक, हार्डवेयरका सरसामान र खाद्यान्न तथा कस्मेटिकका सर–सामानहरुको तस्करी गर्ने गरेका छन् भने नेपालबाट मटर, मरिच र कबाड र मसलाका सर–सामानहरुको भारतमा तस्करी गरि राजस्व छल्ने गरेका छन् ।

तस्करहरु रातीको समयमा तस्करीका सामान मोटरसाईकल तथा साईकलमा लोड गरि सबैला,तरापट्टी, धनुषाधाम लगायत राजमार्ग क्षेत्रमा पुर्याउने गरे गरेका छन् ।

यता, मटर र मरिचका कारोबारीहरु सिमा क्षेत्रमा खोलिएको फर्मसम्म माल ल्याउने र अवसर छोप्दै साईकल मोटरसाईकलमा सिमापारी पठाउने गरेको सोनीगमाका स्थानीयबासीहरुले बताउँछन् ।

स्थानियबासी अनुसार ‘‘सिमा क्षेत्रमा कुनै पनि ठुलो बजार छैन र यहाँ एक पिकप माल खपत हुन महिनौं दिन लाग्न सक्छ तर दिनहुँ पिकपका पिकप आउने मटर तथा मरिच एवं मसलाका सर–सामानहरु कहाँ गई रहेको छ ? प्रहरी प्रशासनले खोज्ने विषय रहेको” स्थानियले जिकिर गरे ।

धनुषा जिल्लाको पुर्वी क्षेत्रमा पर्ने स–सना नाका भरहरिया मैनाथपुर र खाउनाबाट प्रहरीको मिलोमतोमा सो नाकाको प्रयोग गरि विभिन्न सर–समानहरुको चोरी तस्करी गर्नमा प्रहरी पँजीयारको ठुलो हात रहेको बताइन्छ ।

सशस्त्र प्रहरीका घुमुवा पजियारले किरानाको सामग्री ढुवानी गर्ने एउटा मोटरसाइकलमा महिनाको २ हजार देखि ३ हजार साइकलमा गर्नेसँग १५ सय देखि २ हजार र लत्ताकपडा ल्याउने ब्यापारीसँग महिनाको १० हजार लिने गरेको एक ब्यापारीले बताए ।

उनी लकडाउन भन्दा पहिलेनै यहाँबाट सरुवा भएका थिए तर फेरि पैसा कमाउने लोभमा पावर लागाएर लकडाउनमै यहाँ आएका छन् । घुमुवा प्रहरीलेपर्ने काम नगरी भारतबाट मालसामान ढुवानी हुने बाटोमा बस्ने गर्छन् र ब्यापारीहरु सँग पैसा असुल्ने गरेको एक भारतबाट मालसामान ढुवानी गर्ने नाम नखोल्ने सर्तमा एक ब्यापारी बताए ।

महगो मुल्य भएको सामग्री जस्तै लत्ताकपडा बोकेको मोटरसाइकललाई उनी आफैं स्कोटिङ्गनै गरी आफ्नो एरिया कटाउने गरेका छन् ।बाटोमा नभेटाएपछि फोनमा पैसा माग्ने नदिएपछि भोलिदेखि सरसामान ल्याउन नदिने खोसेर भन्सार पठाइए दिने धम्की समेत दिने गरेका छन् ।

यता धनुषा भन्सार कार्यालयले पनि प्रहरीकै सेटिङ्गमा चोरी तस्करी हुने गरेको निष्कर्ष निकालेको नामनलेख्ने शर्तमा भन्सारका एक कर्मचारीले बताए । उनले भने, प्रहरीले चाह्यो भने एउटा सियो पनि छिर्दैन तर हामीले चोरी तस्करी नियन्त्रण गर्न चाहेपनि प्रहरीको साथ नपाईरहेको आरोप लगाए ।

गोप्य सुचनाको आधारमा तस्कर र सामान छोप्न हामी यहाँबाट हिँडदा तस्करले थाहा पाईसकेको हुन्छ उनले भने, हामी रातदिन फिल्डमा दौडाहा लगाएपनि केहि भेटाउदैनौं किनभने उनीहरुलाई हामी हिडेको थाहा पाइसकको हुन्छ उनले बताए ।

कारोना भाइरसको महामारी नियन्त्रणको लागी स्थानीय प्रशासनले जिल्ला पुर्णरुपमा लकडाउनको घोषण गरेर नेपाल भारत सीमा क्षेत्र पूर्णरुपमा बन्द गराएपनि धनुषामा तस्कर समूहले भने विभिन्न बस्तुहरुको तस्करी निर्वाधरुपले गरि रहेका छन् ।