लेबनान विस्फोट : ३ लाख मानिस विस्थापित, ५ अर्ब डलरको क्षति

न्यूज ब्यूरो, एजेन्सी । लेबनानको बेरुतमा मंगलबार भएको विस्फोटबाट ३ लाख मानिस विस्थापित भएको सरकारले जनाएको छ ।

सो विस्फोटमा परी कम्तीमा १ सय जनाको ज्यान गएको र ४ हजारभन्दा बढी घाइते भएको सरकारी सञ्चारमाध्यमले बताएका छन् ।

‘३ लाखभन्दा बढी लेबनानी नागरिक आफ्नो घरमा सुत्न नसक्ने अवस्था छ,’ बेरुतका गभर्नर मार्वान आबुदले भने, ‘बेरुतको आधा जनसंख्या बस्ने घरहरु तत्कालका लागि बस्न नमिल्ने भएको छ ।’

विस्फोटबाट करिब ५ अर्ब डलरको क्षति भएको अनुमान गरिएको छ । मंगलबार बेरुतमा भयानक विस्फोट भएको थियो । जसको धमाका २ सय ४० किलोमिटर टाढा साइप्रससम्म महसुस गरिएको थियो ।

विस्फोट निश्चित कारण थाहा भइसकेको छैन । यद्यपि बन्दरगाहको गोदाममा राखिएको २७ सय टन एमोनियम नाइट्रेट विस्फोट भएको अनुमान गरिएको छ । सो पदार्थ अत्याधिक विस्फोटक मानिन्छ ।

विस्फोटपछि अनेकौँ मुलुकहरुले सहयोग गर्ने प्रतिबद्धता गरेका छन् । कतारले स्वास्थ्य सामग्रीसहितको विमान पठाएको छ ।

फ्रान्सेली राष्ट्रपति इम्यानुएल म्याक्रोँ बिहीबार बेरुत पुग्दैछन् ।