राममय अयोध्या, रामकै रँगमा रँगिए अयोध्यावासी !

न्यूज ब्यूरो, युपी । छिमेकी मुलुक भारत आज राममय भएको छ । भारतको उत्तर प्रदेश राज्यको अयोध्यामा रामनाम गुञ्जायमान भएको छ ।

जसरी जसरी राम मन्दिरको भूमिपूजनको समय नजिकिदै गएको छ सोही अनुरुप अयोध्यावासीमा हर्षोल्लास र उत्साह बढदै गएको देखिएको छ । आम नागरिकदेखि लिएर साधुसन्तहरुमा पनि राम मन्दिर निर्माणको लागि आज हुने भूमि पूजनको लागि देखिएको उत्साह रमणीय बनेको छ ।

अयोध्यामा सबै ठाउँमा उल्लास र खुसीको माहौल बनेको छ । पुरै अयोध्या नगरीको त्रेतायुगको थिममा सजाइएको छ । जहाँ देखेपनि खुसीको माहौल देखिएको छ । अयोध्यामा आज हरेक व्यक्तिमा राममय देखिएको छ । भूमि पूजन हुनुभन्दा अघि नै यस्तो उल्लास संभवत पहिलो पटक देखिएको छ । अयोध्या अहिले भूमि पूजनको लागि तयार भएको छ ।

भूमी पूजनको लागि भारतीय प्रधानमन्त्री नरेन्द्र मोदी जाने भएपछि उत्साह झन बढेको हो । हिन्दुवादी नेता समेत मानिएको नरेन्द्र मोदी तथा युपीका मुख्यमन्त्री योगी आदित्यनाथ भूमि पूजनको लागि अयोध्या रबाना भइसकेका छन् । उनीहरुको सुरक्षालाई मध्यनजर गर्दै कदम कदममा सुरक्षा व्यवस्था अत्यन्तै कडा देखिएको छ ।

साधु सन्तहरु अहिले अयोध्यामा नाचगान गरिरहेको छ । कोही डफली बजाउँदै छ भने कोही डमरु बजारु आफ्नो खुसी बाहिर ल्याइरहेका छन् । अयोध्या आज रामको रँग पुरै डुबेको छ ।

यता, मँगलबार नै जनकपुरबाट जनकपुरको माटो, चाँदीको ५ वटा ईट लिएर जानकी मन्दिरका बडा महन्थ राम तपेश्वर दास पनि अयोध्या पुगेका हुन् । जनकपुरसँग रामको ससुरालीको नाता रहेको भन्दै महन्थ दासले सम्धियानामा ज्वाईको घर निर्माण हुन लागेको भन्दै सगुन स्वरुप जनकपुरको माटो र ईटा लिएर प्रस्थान गरेका थिए ।