गोलबजारमा विद्युत सट हुदा पसल जल्यो, करोडौंको क्षति

सिरहा, १६ माघ । सिरहाको गोलबजार नगरपालिका–६ स्थित सुधीर इन्टरप्राइजेजमा सोमबार मध्यरातमा भएको आगलागीबाट करोडौंको क्षति भएको छ ।

आगलागीबाट पसलभित्र रहेका कम्प्यूटर, ल्याप्टप, सिसि क्यामेरा, राउटर, हार्डडिस्क लगायतका समान जलेर खरानी बनेको इलाका प्रहरी कार्यालय गोलबजारले बताएकाछन् । विद्युत सट भएर आगलागी भएको हुनसक्ने प्रहरीले बताए ।

पीडितले दिएको जानकारी अनुसार एक करोडभन्दा बढी क्षति भएको प्रहरीले जनाएको छ ।प्रहरीका अनुसार आगलागी मध्यरातमा सुरु भएको थियो ।

पसल रहेका घर धनी स्थानीय वीरेन्द्र खड्गा हुन् । आगलागी हुँदा पसलमा कोही थिएन् । आगलागी सुरु भएपछि स्थानीयले नै प्रहरी र पसलका प्रोपराइटर सुधीर साहलाई खबर गरेका थिए । घटना स्थलमा तत्कालै पुगेर प्रहरी र गोलबजारको दमकलले करिब २ घण्टापछि आगो नियन्णमा लिएको थियो ।

आगलागीबाट घरको भित्तो जलेर कालो हुनुका साथै कतिपय ठाउँमा दुलो परेको छ ।