ब्यूरो अपरेशन : प्रहरीकै संरक्षणमा यौनधन्दा !

न्यूज ब्यूरो, सिरहा । प्रहरीकै मिलेमतो र संरक्षणमा होटल, लँज तथा विभिन्न ठाउँमा यौन धन्दा हुने गरेको तथ्य नयाँ होइन ।

प्रहरीले यस्ता कार्य रोकथाम तथा न्यूनिकरणमा लाग्नुपर्नेमा झन प्रहरीले नै साथ दिएपछि अनैतिक क्रियाकलापको अवस्था कहालीलाग्दो छ । सिरहाको गोलबजारका होटल तथा लँजहरुमा पछिल्लो समय खुलेआम यौन धन्दा भइरहेको गुनासो बढेपछि ब्यूरो अपरेशन टिम गोलबजार पुग्यो ।

गोलबजार पुगेर ब्यूरो अपरेशन टिमले विभिन्न होटलको छेउछाउबाट गोप्य निगरानी बढायो । ब्यूरो अपरेशन टिम गोलबजारस्थित मनोज लँज नजिक पुग्यो ।

अपरेशन टिमले त्यहाँका स्थानीयसँग सहयोग लिन खोज्यो । ‘गोलबजारमा यस्ता क्रियाकलाप नौलो होइन, यहाँ प्रहरीकै संरक्षणमा होटलहरुमा यौन धन्दा हुन्छ, अहिले पनि यो होटलमा ५–६ जोडी होला,’ एकजना स्थानीयले नाम उल्लेख नगर्ने शर्तमा भने ।

अर्का एकजनाले पनि यस्तै बताए । होटल भित्रको माहोल र हाउभाउ देख्दा पनि उस्तै देखिन्थ्यो । होटल अगाडि नै प्रहरी बिट भएपनि ब्यूरो अपरेशन टिमले ईलाका प्रहरी कार्यालय गोलबजारका प्रहरी निरीक्षक जनक पुरीसँग समन्वय गर्न खोज्यो ।

त्यहाँका इन्चार्जसमेत रहेका पुरीलाई फोन गरे लगत्तै केहि मिनेटपछि मनोज लँजबाट ४–५ जोडी हत्तारहत्तार निस्केर टाप कसे । त्यसपछि प्रहरीको टोली आयो, होटल खानतलासी गर्यो । तर, उनीहरु त्यतिबेलासम्म भागिसकेका थिए ।

गोलबजारमा मात्रै होइन, सिरहाका ठूला बजार लहान, मिर्चैया, सिरहा लगायतका ठाउँमा सञ्चालित होटल तथा लँजहरुमा समेत खुल्लमखुल्ला यौनधन्दा हुन्छ ।

होटलमा कोहि नभेटेपछि प्रहरीको टोली फिर्ता भयो । त्यसपछि ब्यूरो अपरेशन टिम गोलबजारमै सञ्चालित विकास लँज अगाडी झण्डै १ घण्टा बसेर भिडियो फुटेज लिइरहँदा एक युवती र एक पुरुष लँजबाट निस्के ।

लगत्तै प्रहरी आए, होटल खानतलासी गर्यो । खानतलासीपछि प्रहरीको टोलीले ब्यूरो अपरेशन टिमलाई घेरा हालेर ‘किन भिडियो लिनुभएको ? यो भिडियो डिलिट गरिदिनुस्, इन्सपेक्टर साबले भन्नुभएको छ’ भनेर भन्यो । ब्यूरो अपरेशन टिमले भिडियो डिलिट गर्न मानेनन् ।

प्रहरीले डिलिट गर्न जिद्दी गरेपछि ‘ठिक छ, हामीले सिडिओ र एसपी साबसँग कुरा गर्दैछौं, कारण सोधेर डिलिट गरिदिन्छौं,’ भनेपछि प्रहरी त्यहाँबाट हिँडे ।

प्रहरीलाई जानकारी हुने वित्तिकै होटलबाट एकैचोटी ४–५ जना महिला र पुरुष निस्केर टाप कस्नुले र प्रहरीको हाउभाउले पनि यहाँ प्रहरीकै मिलेमतोमा यौनजन्य क्रियाकलाप हुने गरेको प्रष्ट हुन्छ । ‘हेर्नु भयो, तपाईले फोन गरे लगत्तै होटलबाट सबै भाग्यो, कसैले यस्ता क्रियाकलाप बारे प्रहरीलाई जानकारी गराएपछि प्रहरीले पहिला होटल सञ्चालकलाई खाली गर्न लगाउँछ, अनि खानतलासी गर्न आउँछ, सिओर हुनुस्,’ स्थानीयले भने ।

स्थानीयहरुले यौनधन्दा हुने गरेको भनेर पटकपटक प्रहरीको ध्यानाकर्षण गराएपनि यौन धन्दा झन फष्टाउँदै गएको छ । होटल सञ्चालकले मासिक मोटो रकम बुझाएर प्रहरीको ‘मुख बन्द’ गराउँदै आएको स्थानीय बताउँछन् ।

गोलबजारमा मात्रै होइन, सिरहाका ठूला बजार लहान, मिर्चैया, सिरहा लगायतका ठाउँमा सञ्चालित होटल तथा लँजहरुमा समेत खुल्लमखुल्ला यौनधन्दा हुन्छ । तर, प्रहरी भने मुखदर्शक बनेर बसिरहेका देखिन्छन् ।