राजदेवी मन्दिरसँगै 'मदिरा पसल'

ब्युरो अपरेशन

जनकपुधाम, १४ माघ । हिन्दुधर्मावलम्बीहरुको आस्थाको केन्द्र मानिन्छ कुनै पनि देवी देवताको मठ मन्दिर, तर धनुषाको एक ठाउँ जहाँ मन्दिरसँगै मदिरा पसल समेत सँचालन गरिएको छ ।

हो, यस्तो भन्दा सुन्नमा अच्चम लाग्ला तर यो सत्य हो ।
धनुषाको क्षीरेश्वरनाथ नगरपालिका र लक्ष्मीमिनीयाँ गाउँपालिकाको सीमामै रमदैया भवाडी स्थित रहेको आस्थाका केन्द्र राजदेवी मन्दिरसँगै मदिरा पसल समेत सँचालनमा छन् ।
हुनतः मन्दिर भने क्षीरेश्वरनाथ नगरपालिकाको सीमा भित्र पर्छ , मन्दिर जनकपुर महेन्द्रनगर सडकखण्ड (राजमार्ग) मै पश्चिमपटटी छेउमै स्थापित रहेको छ ।

कुनै देवी देवताको मठ मन्दिरदेखि करिब ३०० मिटर दुरीसम्म मदिराजन्य वस्तुको पसल तथा विक्रि वितरण राख्न नपाउने प्रावधान रहेपनि मन्दिरसँगै मदिरा पसल सँचालन गर्नु रतिभर पनि आस्था सम्बद्ध र कानुन सम्बद्ध देखिदैन ।

तर मन्दिरको छेउमै पर्खालसँगै मदिरा पसल सँचालन गर्दा मन्दिर व्यवस्थापन समिति, मन्दिरका महन्त र नगरपालिकाका प्रमुखले चुप्पी लादनु कतै न कतै मिलोमत्तोमा सँचालन गरिएको हो भनेर शंका उब्जीनु स्वभाविक हो ।

यता, मदिरा पसलको नाम समेत राजदेवी कोल्ड स्टोर भनेर राखिएको फोटोमा प्रष्ट हेर्न सकिन्छ । मन्दिरसँगै मदिरा पसलको सँचालन र राजदेवीकै नामबाट सँचालन गर्नु मन्दिरका महन्त र व्यवस्थापन समिति उपर पनि प्रश्न चिन्ह खडा हुन्छ ।

ब्युरो अपरेशनको क्रममा, हामीले सोधपुछ गर्दै जाँदा राजदेवीको मन्दिर रहेको क्षीरेश्वरनाथ नगरपालिकाका प्रमुख, मेयर योगेन्द्र पँजियारसँग कुराकानी गरयौँ, उनले यस्तो भने ,

हामीलाई कसैले जानकारी नै गराएन अहिलेसम्म । त्यो मन्दिर चैँ हाम्रै नगरपालिका भित्र पर्छ तर मन्दिरसँगै मदिरा पसल समेत सँचालन गरिएको छ भनेर मलाई तपाईले सोध्दा जानकारी भयो त ।

मन्दिरसँगै मदिरा पसल सँचालनमा छ, मदिरा पसल सँचालन गर्न तपाईसँग वा नगरपालिका सँग अनुमति त पक्कै लिएको होला नी ?

हैन, त्यस्तो केही जानकारी आएको छैन र त्यस्तो केही अनुमति पनि दिएका छैनौ हामी, अब कसरी सँचालन गरियो त्यो थाहा भएन, अब जानकारी भयो, मन्दिरबाट त्यो पसल हटाउन पहल गर्छौं, यो कदाचित राम्रो होईन र मानवको आस्था विरुद्ध, धर्म विरुद्ध हो, हामी पहल गछौं ।

हरेक शुक्रवारका दिन राजदेवी मन्दिरमा बोका बलि दिने प्रथा छ । शुक्रवार मात्रै विभिन्न ठाउँबाट भाकल गरेकाहरुले भाकल पूरा गर्न भेटी स्वरुप बोका बलि दिने गरेको छ ।
हुनत, बोका बलि दिनुपर्ने भन्ने कत्तै जोर जरवरदस्ती नगरिएपनि, विभिन्न सँघ सँस्थाहरुले बोका बलिको विरोध गरेपनि अझ रोकिएको छैन ।

यसरी बोका चढाउन आउने श्रद्धालुहरुले मासु उत्तै पकाएर खाने प्रावधान पनि छ । मासु उत्तै पकाएर खानुपर्ने भएकोले रक्सीको विक्रि समेत हुने उदेश्यले मन्दिरसँगै मदिरा पसल सँचालन गरिएको देखिएको छ ।

दिनहुँ जसो हुन्छ झैझगडा

भाकल चढाउन आउने दर्सालुहरु मासु उत्तै पकाएर खाने भएपछि रक्सी खानेहरुले छेउबाटै रक्सी लिएर उत्तै बसेर खान्छन् । रक्सी खाएपछि विभिन्न समयमा झैझडा निम्त्याएको समेत देखिएको छ । हिन्दुहरुको आस्थाको केन्द्र मानिएको उत्त मन्दिरमा हरेक शुक्रवार बोका बलिका दिन रक्सी खाएर एक आपसमा झै झगडा गर्दै समाजिक सद्भाव खल्बलाउने गरेको देखिएको छ ।

यस्तो स्थितिमा पनि दुई स्थानीय तहका जिम्मेवारी व्यक्तिहरुले केही पहल थालेको छैन भने मन्दिर व्यवस्थापन समिति सहित स्थानीय प्रशासन तथा गुठी सँस्थानले समेत त्यसको निराकरणको लागि पहल कदम चालेको छैन ।