अमेरिकाद्धारा कोरोनाविरुद्धको खोपका लागि अहिलेसम्मकै ठूलो लगानी

न्यूज ब्यूरो, एजेन्सी । कोरोना भाइरसबाट विश्वमा सबैभन्दा बढी पीडित अमेरिकाले यसविरुद्ध खोप विकासमा व्यापकता दिइरहेको छ ।

यसै क्रममा अमेरिकी सरकारले कोरोनाविरुद्ध खोप विकासमा विश्वमै सबैभन्दा अगाडि रहेको बेलायतको अक्सफोर्ड विश्वविद्यालय र औषधि निर्माता कम्पनी आस्ट्राजेनेकालाई यसका लागि १ अर्ब २० करोड डलर अनुदान उपलब्ध गराउने भएको छ ।

अमेरिकी सञ्चारमाध्यम द न्युयोर्क टाइम्सका अनुसार अमेरिकाको स्वास्थ्य तथा मानव सेवा विभागले बिहीबार खोप निर्माणका लागि अनुदान उपलब्ध गराउने सम्झौता गरेको हो ।

जसमा अनुदान दिएबापत खोपको तेस्रो चरणको क्लिनिकल परीक्षण अमेरिकामा गराउनुपर्ने र यसका लागि कम्तीमा ३० करोड वटा खोप उपलब्ध गराउनुपर्ने सर्त अमेरिकाले राखेको छ ।

यस अर्थमा अनुदान भनिए पनि अमेरिकाले परीक्षण सफल हुनेबित्तिकै कम्तीमा ३० करोड खोप बुक गर्ने उद्देश्यले यस्तो निर्णय गरेको विश्लेषण गरिएको छ ।

अमेरिकाले यसअघि कोरोनाविरुद्ध खोप विकास गर्ने अन्य परियोजनासँग पनि सम्झौता गरिसकेको छ । एस्ट्राजेनेकासँगको सम्झौता चौथो र अहिलेसम्मकै सबैभन्दा ठूलो खोप अनुसन्धान सम्झौता भएको द न्युयोर्क टाइम्सले जनाएको छ ।

तर, धेरै जनस्वास्थ्य विशेषज्ञ र वैज्ञानिकले यो खोप अर्को वर्षसम्म उपलब्ध हुने सम्भावना न्यून रहेको बताएका छन् । साथै संसारभरका लागि अर्बौं खोप आवश्यक पर्ने उनीहरूको अनुमान छ ।

तर, उत्पादक कम्पनी एस्ट्राजेनेकाले खोपका लागि अरू पनि धेरै सरकार र संस्थासँग सम्झौता भइसकेको बताउँदै आफूसँग अहिले नै १ अर्बवटा खोप उत्पादन गर्ने क्षमता रहेको र आगामी सेप्टेम्बरसम्ममा पहिलो चरणको वितरणसमेत सुरु गरिने दाबी गरेको छ ।

विश्वभरि सस्तो र सहज रूपमा खोप उपलब्ध होस् भनेर आफूले संसारका सात देशबाट एकैसाथ उत्पादन गर्ने लक्ष्य लिएको आस्ट्राजेनकाले जनाएको छ । यसका लागि विभिन्न देशका औषधि उत्पादक कम्पनीसँग सम्झौता प्रक्रिया अघि बढाइएको कम्पनीको भनाइ छ ।

तीमध्ये भारतको सेरम इन्स्टिच्यूट अफ इन्डियासँग पनि सम्झौता गरेको आस्ट्राजेनकाले जानकारी दिएको छ । कोरोनाविरुद्ध खोप बनाउन अहिले विश्वका वैज्ञानिकबीच होडबजाी नै चलिरहेको छ ।