जनकपुरः लकडाउनमा प्रदेश साँसद 'यादव' को दादागिरी (भिडियो सहित)

न्यूज ब्यूरो, जनकपुरधाम । प्रदेश नं. २ का एक प्रदेश साँसदले प्रहरीलाई तथानाम भन्दै गरेको एक भिडियो सार्वजनिक भएको छ ।

प्रदेश नं. २ को सर्लाही जिल्ला क्षेत्र नं. २ (ख) बाट तत्कालिक संघीय समाजवादी फोरम तथा हालको जनता समाजवादी पार्टी नेपालका प्रदेश साँसद अशोक यादवले प्रहरीलाई धै–धम्की देखाउने गरेको भिडियोमा देखिएको छ ।

यो घटना प्रदेश नं. २ को अस्थायी राजधानी जनकपुरको भानुचोकको हो । सरकारले लकडाउन कडाई गरेको बेला साँसदको गाडी बिना पासको ओहोर दोहोर गरेपछि प्रहरीले नियन्त्रणमा लिएको थियो ।

साँसदको सरकारी नम्बर प्लटेको गाडी कैयौं पटक बिना पासको ओहोर दोहोर गरेपछि जनपद प्रहरी र ट्राफिक प्रहरीको सँयुक्त टोलीले गाडीलाई नियन्त्रणमा लिएपछि विवाद सुरु भएको प्रहरीले जनाएको छ ।

गाडी नियन्त्रणमा लिएपछि चालकले तत्कालै साँसद यादवलाई फोन गरी भानुचोक बोलाएका थिए । ओहोर दोहोरको बेला साँसदको गाडीमा साँसद भने आफैं थिएनन् ।

गाडीलाई प्रहरीले नियन्त्रणमा लिएपछि साँसद यादवलाई बोलाइएको थियो । साँसद यादव आएलगत्तै जनकपुरको रेल्वे स्टेशन प्रहरी चौकीका ईन्चार्जलाई समेत तथानाम एवम् अपशब्द बोल्दै धाक–धम्की लगाउने गरेको भिडियोमा प्रष्ट देखिएको छ ।

भिडियोमा भनिएको छ, –“कसको गाडी हो भनेर चिन्दैन ? तिमिहरु अशोक यादवलाई चिन्दैन ? सरकारी गाडी समात्ने ?, खुरुक्क चाभी देउ ।” त्यसपछि आफ्नो चालकमाथि जाईलाग्छन साँसद ।

विश्व महामारीको रुपमा फैलिएको कोरोना भाइरससँग जुध्न सुरक्षाकर्मीले विना कुनै सुरक्षाको आम नागरिकको सुरक्षाको लागि दिनरात खटेपनि प्रदेश साँसदले देखाएको पदको धाक र प्रयोग गरेको शब्दहरु कानुनभन्दा माथि साँसदहरु छन भनेर प्रष्ट पारेको छ ।

साँसदको यस्तो पारा र धाकधम्कीपूर्ण एवम् शक्तिको दुरुपयोग गरिएको भिडियोमा देखिपछि आम सर्वसाधारणहरु आक्रोसित भएका छन् ।

यसबारे जिल्ला प्रहरी कार्यालय धनुषाले बुझेर मात्र भन्ने प्रतिक्रिया दिएको हो ।

यता, साँसद यादवले भने, प्रहरीले सवारीको पास हुँदाहुँदै पनि जबरदस्ती सवारीलाई रोकेर तनाव दिएपछि आफू गएको बताएका छन् ।

सवारीको पास लिएर विशेष बैठकमा भाग लिनको लागि आएको भन्दै भानुचोक प्रहरीले आफ्नो गाडी नियन्त्रणमा लिएपछि आफू पुगेको बताएका छन् ।

साँसद यादवले प्रहरीहरु गुण्डाशैलीमा प्रस्तुत भएपछि आफू मात्र बोलेको भन्दै खण्डन गरेका छन् । समाचार लेखुन्जेलसम्म साँसद यादवसँग सम्पर्क हुन सकेको थिएन ।

---

यस समाचारमा साँसद अशोक यादवसँग सम्बन्धित २०७२ सालको घटनाक्रम जोडिएकोमा त्यसलाई सच्याइएको छ– सम्पादक