बँगलादेशमा रहेका विद्यार्थीहरुको गुहार– 'विदेशी भूमि भन्दा आफ्नै देशमा मर्न पाउँ सरकार'

न्यूज ब्यूरो, जनकपुरधाम । अध्ययन अध्ययापनको लागि बँगलादेश गएका नेपाली विद्यार्थीहरु उद्धारको लागि गुहार लगाएका छन् ।

बँगलादेश स्थित रहेको नेपाली राजदुतावासमा गत एक महिना अघि नै सकुशल नेपाल फर्काईदिने वातावरण मिलाउन आग्रह गरेपनि हालसम्म केही नगरेको गुनासो पोखेका छन् ।

बंगलादेशमा रहेका कुनै पनि नेपाली नागरिक कोभिड–१९ को संक्रमणको शिकार नभएता पनि समयमै उद्धार गर्न ढिलासुस्ती भएको भन्दै उद्धारको लागि गुहार लगाएका छन् ।

सरकारसँग गुहार लगाउँदै विद्यार्थीहरुले त्यहाँ रहेका कैयौं नेपाली नागरिकहरु चाडै संक्रमित नहोलान भन्न सकिन्न र भविष्यमा नेपाल सरकार र सम्बन्धित निकायले गरेको उद्धारको कुनै अर्थ नरहने चेतावनी समेत दिएको छ ।

“उद्धारको लागि यहाँ रहेका नेपाली बिधार्थिहरुले दिनहुँ चित्कार गरिरहेका छन्,असहज महशुस गरिरहेका छन् , दैनिकी खान बस्न समेत कठिनाइ भोगिरहेका छन् , तसर्थ हरेक नेपाली नागरिक त्राशमय बातावरणमा बस्न बाध्य भइरहेको बास्तविकता सम्पूर्ण मानव अधिकारकर्मी, नागरिक समाज,सरोकारवाला समक्ष पुन ध्यानाकर्षण गराउन चाहन्छौं ।”– विद्यार्थीहरुद्धारा जारी गरिएको विज्ञप्तिमा उल्लेख छ ।

सर्वोच्च अदालतले समेत आफ्नो देशको नागरिकलाई सकुशल स्वदेश फर्काउन आदेश दिइसके पनि यसबारे पहल नभएको भन्दै आफूहरु अहिले अभिभावक विहिन भएको भनेर दुःखेसो पोखेका छन् ।

आधारभूत मानव अधिकारको सरक्षण वारे सम्बन्धित निकाय गम्भीर नभए पछि अध्ययनका लागि रहेका नेपाली बिधार्थिहरु अभिभावकबिहिन एवं राज्यविहीन भएको महशुस गर्न थालेको पनि उल्लेख विज्ञप्तिमा गरेको छ ।

“यस्तो बिपत अवस्थामा आफ्नो नागरिकलाई स्वदेश फर्काउनु राज्यको दायित्व भए पनि हामीले राज्यको असहजतालाइ मध्यनजर गरि आ(आफ्नै खर्चमा विमान चार्टर गरि सरकारले तोकेकै ठाउमा क्वारानटाईनमा बस्न मन्जुर भई अपिल गर्दै आएका छौं ।”– विज्ञप्तिमा उल्लेख गरिएको छ ।

उनीहरुले आफूहरुलाई वैकल्पिक बाटो हवाई मार्ग वा स्थल मार्गबाट उद्धार गर्न आग्रह गरेको हो । उनीहरुले सरकारले आफूहरुलाई आफ्नो देश ल्याउन सके गाउँ गाउँमा गएर निःशुल्क सेवा प्रदान गर्ने वाचा पनि विज्ञप्तिमा मार्फत गरेका छन् ।

“सरकारले हामीलाई यहाँबाट चाँडो उद्धार गरी नेपाल लगे र आवश्यक सुरक्षाका साम्रगी उपलब्ध गराएमा हामी आफूले सिकेको ज्ञान र सीप गाउँगाउँँमा पुगेर निःशुल्क सेवा दिन तयार छौँ । महामारीले सताएको यो समयमा हामी नेपालमा सेवा दिन सक्छौँ ।अहिलेको समयमा हामीलाई स्वदेश फर्कन जति आवश्यक छ, त्योभन्दा बढी हाम्रो आवश्यकता कोरोनाको कहर फैलिएको हाम्रो समाज र देशलाई पनि छ।”– विज्ञप्तिमा भनिएको छ ।

यसका साथै, उनीहरुले यथाशिघ्र उद्धार नगरे डिजिटल रिले अनसन बस्ने समेत चेतावनी दिएको हो । रोग, भोक र त्रासले विदेशी भूमिमा मर्नु भन्दा आफ्नै भूमिमा मर्न पाउँ भन्दै उनीहरुले सरकारसँग गुहार लगाएका छन् ।