कोरोना नियन्त्रण गर्न नसकेको भन्दै ओबामाद्धारा ट्रम्पको कडा आलोचना

न्यूज ब्यूरो, एजेन्सी । अमेरिकाका पूर्वराष्ट्रपति बाराक ओबामाले वर्तमान राष्ट्रपति डोनाल्ड ट्रम्पले अपनाएको गलत रणनीतिका कारण देशमा कोेरोना महामारी भयावह बनेको आरोप लगाएका छन् ।

अमेरिकी सञ्चार संस्था सीएनएनका अनुसार आफ्ना पूर्वकर्मचारी तथा सहयोगीसँगको निजी कन्फ्रेन्स कलमा ओबामाले ट्रम्प प्रशासनले महामारीका बेला पनि आफ्नो स्वार्थ मात्र हेर्दा यो स्थिति आएको आरोप लगाएका हुन् ।

ओबामाले आउँदो नोभेम्बरमा हुने राष्ट्रपति चुनावमा आफूले जो बाइडेनका पक्षमा सशक्त भूमिका निर्वाह गर्न चाहेको पनि बताएका छन् । उनले यसअघि नै राष्ट्रपतिको उम्मेदवारमा बाइडेनलाई समर्थन रहेको घोषणा गरिसकेका छन् ।

बाइडेन ओबामा कार्यकालमा उपराष्ट्रपति थिए । आइतबार बिहान ६ बजेसम्मको तथ्यांकअनुसार अमेरिकामा कोरोनाबाट ८० हजार ३७ जनाको मृत्यु भइसकेको छ ।

अमेरिकामा संक्रमितको संख्या १३ लाख ४७ हजार नाघेको वर्ल्डओमिटरले जनाएको छ ।